УЦУОШГ-ын мэдээлснээр өнөөдрөөс эхлэн ихэнх нутгаар нойтон цас орж, цасан шуурга шууран, эрс хүйтрэх ажээ. Тодруулбал, өнөөдрөөс баруун аймгуудын нутгаар эрс сэрүүссэн бол Баян-Өлгий, Увс, Хөвсгөлийн  хойд нутгаар цас орж эхэлжээ. Энэ үеэр ширүүн салхи, шороон шуурга шуурах аж. Түүнчлэн өнөө шөнөдөө ялангуяа Говь-Алтай, Завхан, Баянхонгор, Архангай орчимд хүйтрэх юм байна.

Мөн энэ сарын 14-нд Говь болон Зүүн аймгуудын нутгаар цасаар шуурах бол маргаашаас баруун болон төвийн нутгаар цас орох ажээ. Харин цаашид төв болон зүүн аймгийн хойд хэсгээр бага зэргийн цас орж, салхитай, хүйтний эрч чангарах юм байна. Энэ үеэр томоохон гол Идэр, Тэсийн хөндий, Алтайн уулс, Хангайн уулс, Дархадын хотгор, Хэнтийн уулс, Тэрэлжийн сав, Ерөө, Туулын сав газраар шөнөдөө -25-30 хэм хүрч, өдөртөө  -13-18 хэм байх бол говийн аймгуудын нутгаар шөнөдөө – 8-13 хэм хүйтрэх бол өдөртөө -10 градус байх юм. Ерөнхийдөө арваннэгдүгээр сарын сүүлчээр буюу 20-ны үеэр өдөртөө бага зэрэг дулаарах ч сарын сүүлч 10 хоногийн дунджаар салхи шуургатай хүйтний эрч чангарах төлөвтэй байгаа ажээ.

Мөн хөдөө явж байгаа иргэдэд дараах зөвлөмжийг өгч байна. Энэ нь өнөөдрийг хүртэл нийт нутгаар харьцангуй дулаахан байсан. Хэдийгээр ойрын үед хүйтэрч байгаа ч гол нуурууд хөлдөх хэмжээ болоогүй. Арванхоёрдугаар сарын дунд үеэс мөс тогтож, гол нуур бүрэн хөлддөг аж. Тиймээс иргэдийг гол нуураар зорчихгүй байхыг анхааруулж байна гэсэн юм. 

Л.Сайнаа