Хүнсний ногоочид, үйлдвэрлэгчид, хөдөө аж ахуйн мэргэжилтний төлөөлөл болсон 80 хүнийг хамруулсан "Органик бордоо" сэдэвт гурван өдрийн сургалт өнөөдөр ХХААХҮЯ-ны хурлын танхимд эхэллээ.

Хүнс, хөдөө аж ахуй, хөнгөн үйлдвэрийн яам, Монголын бүтээмжийн төвөөс Адра Монгол ОУБ, Германы Олон Улсын Хамтын Ажиллагааны Нийгэмлэг, НҮБ-ын Хүнс, хөдөө аж ахуйн байгууллага, Монгол ногоо төсөл, Азийн бүтээмжийн байгууллага, Нийслэлийн Хүнс, хөдөө аж ахуйн газар, МҮХАҮТ-тай хамтран зохион байгуулж буй "Органик хүнс, хөдөө аж ахуй" үндэсний III чуулганыг угтан явуулж буй тус сургалтын эхний өдөр "Органик хүнсний баталгаажуулалт" гэсэн асуудалд төвлөрч байна.

Органик бордоог өрхийн болон үйлдвэрлэлийн түвшинд бэлтгэж, ашиглах зорилготой сургалтыг нээж, ХХААХҮЯ-ны Хүнсний үйлдвэрийн бодлогын хэрэгжилтийг зохицуулах газрын дарга Т.Гантогтох үг хэлсэн бол энэ цогц асуудлын хүрээнд Азийн бүтээмжийн байгууллагын зөвлөх Камал Мелвани оролцогчдод сургалт орж байна.

Тэрбээр, "Монголын байгаль, цаг уурын нөхцөл болон байгаль орчныг хамгаалах асуудлууд", "Нөхөн сэргээгдэх хөдөө аж ахуйн тухай", "Нөхөн сэргээгдэх хөдөө аж ахуйн зарчмыг хэрэгжүүлснээр Монгол Улсын хөдөө аж ахуйн үйлдвэрлэлийн бүтээмжийг нэмэгдүүлэх нь", "Өөрт байгаа нөөц бололцоондоо тулгуурлан ойрын болон хэт ирээдүйд хэрхэн хөгжих вэ", "Хөрсний үржил шимийг сайжруулах үндсэн механизмууд", "Бордоог хадгалах хөрсний үржил шимийг сайжруулах" зэрэг сэдвээр танилцуулга хийж, хэлэлцүүлэг өрнүүлж байна.

Л.Сайнаа