АТГ-аас цаг үеийн асуудлаар мэдээлэл хийлээ. Хуралд АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү, тус газрын Тамгын хэлтсийн дарга, эрхэлсэн комиссар З.Баасанням нар болон бусад холбогдох хүмүүс оролцсон юм.
ЖДҮХС-ын асуудлаар тус газрын Тамгын хэлтсийн дарга, эрхэлсэн комиссар З.Баасанням “ХХААХҮЯ-ны Жижиг, дунд үйлдвэрийг хөгжүүлэх сангаас 2016 онд 200 гаруй аж ахуйн нэгжид зээл олгосонтой холбогдуулсан асуудалд хэрэг бүртгэлийн хавтас үүсгээд мөрдөн шалгах ажиллагаа явагдаж байна. Сайдаар ажиллаж байсан Б.Батзориг гишүүнээс өөр гишүүнийг дуудаж байцаагаагүй. Ямар нэгэн улс төрийн болон төрийн албан тушаалтнаас байцаалт аваагүй. Мөрдөн шалгах ажиллагаа прокурорын хяналтан дор явагдаж байгаа. Төсөл хөтөлбөр тус бүрийг нэг мөсөн нарийвчлан үзэж байгаа. Их Хурлын гишүүдтэй холбогдолтой асуудлыг Улсын Ерөнхий прокурор гишүүний эрхээс түдгэлзүүлэх эсэхийг нэгдсэн чуулганаар өргөн барих журамтай. Энэ журмын дагуу явагдаж байгаа” гэв.
АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү “АТГ төрийн өмчит болон төрийн өмчийн оролцоотой, орон нутгийн өмчит аж ахуйн нэгжүүд, яам, агентлаг гээд нэлээд өргөн хүрээнд шалгалт хийж ажилласан. Хууль зөрчиж тушаал, шийдвэр гаргадаг, төсөв санхүү, худалдан авах ажиллагаан дээр хууль зөрчдөг, өөрсдийн хамаарал бүхий этгээддээ давуу байдал олгодог, илт хууль бусаар тендер, сонгон шалгаруулалт, худалдан авалтуудыг зохион байгуулж, эрх мэдлээ урвуулан ашигладаг, хахууль авсан зэрэг олон гэмт хэрэг, ашиг сонирхлын зөрчил бүхий асуудлуудыг илрүүлж, шалгаад явж байгаа” хэмээн ярьлаа.
АТГ-ын Мөрдөн шалгах хэлтсийн дарга, эрхэлсэн комиссар Идэрцог “С.Баяр зэрэг Ерөнхий сайд нартай холбоотой асуудлыг шалгаж байгаа. Холбогдон шалгагдаж байгаа хэргүүдийнх нь цаана Оюунтолгой, Дубайн гэрээ гэх мэтчилэн улс дамжсан гадаад улстай холбогдолтой мөрдөн шалгах ажиллагаа хамтарч явагдаж байгаа. Гадаад улсууд бидний хүсэлтээр эрүүгийн хэрэг үүсгэгдэж, тэнд хорьчихсон байгаа гэдэг мэдээ мэдээллийг ирүүлж, харилцан мэдээлэл солилцож, манай улсад ирж хүртэл ажиллах гэх мэтчилэн мөрдөн шалгах ажиллагаа хийгдэж байгаа. Цар хүрээний хувьд богино хугацаанд шийдвэрлэчих юм биш.
Харин Стандарт банкны хэрэг дээр авсан зээл, зарцуулалт, санхүүгийн мөрдөн шалгалтаар үйлдлүүд нь гарчихсан. Ажиллагааны явцад прокурорын байгууллагаас ажлын хэсэг гарчихсан, өдөр тутмын хяналтад хянагдаж байгаа. Стандарт банктай холбоотой асуудлыг ойрын үед мөрдөн шалгах ажиллагааг нь дуусгаж бид шүүхээр шийдүүлнэ.
ЖДҮХС-аас зээл авсан тухайн аж ахуйн нэгжийн Жижиг, дундын тухай хуулийн тавдугаар зүйлд заасны дагуу үнэхээр шаардлага хангасан нь Жижиг, дунд үйлдвэрлэгч байсан уу, олгож байгаа үйл ажиллагаанд ямар нэгэн албан тушаалтны оролцоо байна уу, авснаасаа хойш энэ зээлийг хуулиар хориотой зарцуулалтыг зарцуулсан байна уу гэдгийг мөрдөн байцаалтын явцад сэжүүр болгон шалгаж байгаа. Шалгалтын хүрээнд ямар нэгэн байдлаа дүрэм журмаа зөрчиж олгогдсон, шаардлага хангахгүй байж болохоор мөн мөнгөний зарцуулалттай холбоотой асуудлаар хууль тогтоомж зөрчсөн байхаар үйлдэгдсэн эсэх нь тогтоогдож байгаа юм.
Түүнчлэн АСЕМ-тай холбоотой 10 орчим хэрэг, хэрэг бүртгэл дээр бүртгэгдсэн. 2018 оны аравдугаар сард Аудитын дүгнэлтийг гаргуулчихсан, шалгалтын ажиллагаа нарийвчлан цагдаа, прокурорын хяналтан дээр мөрдөн шалгах ажиллагаа явагдаж байна”.
Хяналт шалгалт, дүн шинжилгээний хэлтсийн дарга, эрхэлсэн комиссар Х.Хашбаатар “2017 онд 40032 албан хаагч хөрөнгө оруулгын мэдүүлгийг өгсөн. Үүнээс төрийн өндөр албан тушаалтан 236 байгаа. УИХ-ын гишүүний хөрөнгө орлогын мэдүүлгийг УИХ-ын Ёс зүйн хороо өргөдөл, гомдол болон тэдгээрт үндэслэж шалгадаг. Харин УИХ-ын гишүүн давхар Засгийн газрын гишүүнээр ажиллаж байвал АТГ шалгах нөхцөл бүрддэг юм” хэмээн онцолсон юм.
Б.Лхам
Сэтгэгдэл (1)