Монголын Мастеруудын Биеийн Тамир, Спортын Хорооны “Алтан хараацай” тэргүүн дээд шагнал гардуулах ёслол, хүндэтгэлийн ажиллагаа 12 дугаар сарын 15-ны өдөр боллоо.
Нийтийн биеийн тамирыг хөгжүүлэх үйлсэд бодит хувь нэмэр оруулсан, биеийн тамирыг дэмжигч байгууллагаар Чингэлтэй дүүргийн Засаг даргын Тамгын газар шалгарч “Алтан хараацай” тэргүүн дээд шагналын хошой эзэн боллоо.
Мөн Чингэлтэй дүүргийн биеийн тамир, спортын салбарыг хөгжүүлэхэд үнэтэй хувь нэмэр оруулж буй Чингэлтэй дүүргийн Засаг дарга Ж.Эрдэнэбатыг Монголын Үндэсний Олимпийн Хорооны тэргүүн дээд шагнал “Алтан од” шагналаар шагналаа.
Чингэлтэй дүүргийн Засаг даргын Тамгын газраас 2018 онд нийтийн биеийн тамирыг хөгжүүлж, хүн амын эрүүл мэндийг бэхжүүлэх, чөлөөт цагийг зөв боловсон өнгөрүүлэх зорилгоор иргэдийн дунд нийт 98 арга хэмжээ зохион байгуулж, 61258 иргэн хамруулжээ. Дүүргийн иргэдийн спортын VII их наадмыг спортын 8 төрлөөр зохион байгуулж, давхардсан тоогоор 107 байгууллагын 1652 иргэнийг оролцууллаа. Уг тэмцээнд шилдгээр шалгарсан 160 гаруй тамирчин Нийслэлийн иргэдийн спортын VII их наадамд оролцож хурд хүч, авхаалж самбаагаа
сорин өрсөлдсөн юм. Наадмын софт волейболын төрөлд А.Раднаа ахлагчтай 19 дүгээр хорооны баг алтан медаль, хийн дасгалын 55-аас дээш насны ангилал болон аэробикийн төрөлд О.Цэгмэд ахлагчтай 6 дугаар хорооны баг тамирчид мөнгө, хүрэл медаль, олс таталтын төрөлд Т.Идэрцагаан ахлагчтай 16 дугаар хорооны баг, тамирчид хүрэл медаль тус тус хүртсэн байна.
Дүүргийн Засаг даргын дэргэд спортын 13 төрлөөр өсвөрийн шигшээ багийг хичээллүүлж байна. Шигшээ багийн баг тамирчид 2018 онд олон улс, улс, нийслэлийн чанартай тэмцээнээс 195 алт, 178 мөнгө, 526 хүрэл медаль хүртэж Ази тивийн аварга, Дэлхийн аварга, Залуучуудын олимпын дэд аварга тамирчидтай боллоо.
Нийслэлийн Засаг даргын нэрэмжит “Граунд Гольфийн Ази тивийн аварга шалгаруулах анхдугаар тэмцээн” 6 дугаар сарын 29-30 –ны өдрүүдэд “Чингис Хааны хүрээ” цогцолборт амжилттай зохион байгуулагдлаа. Тэмцээнд нийслэлээс 240, хөдөө орон нутгаас 100, гадаадын 12 орноос 70, Өвөр Монголоос 20, нийт 448 тоглогч оролцсон байна. Чингэлтэй дүүргээс нийтдээ 11 Алтан бөмбөгийн эзэд тодорч багийн дүнгээр 1 дүгээр байр эзэлсэн байна.
Л.Сайнаа
