Нийслэлийн Засаг дарга асан Э.Бат-Үүл сэтгүүлч Ч.Лодойсамбуугийн бэлтгэн хүргэдэг “Улаан бал” нэвтрүүлэгт оролцож цаг үеийн асуудлаар байр сууриа илэрхийлжээ. Энэ үеэр тэрбээр Ерөнхийлөгчийн засаглалыг эсэргүүцэж буй шалтгаан болон сүүлийн үед өрнөөд байгаа асуудлаар ярьсан юм.

Тэрбээр “Бидэнд гомдсондоо ч юм уу, эгдүүцсэндээ чанга гар хүсэж байгаа юм бол тэр залуучуудад эрх чөлөөний ухамсар байхгүй юм байна. Соёл нь бий болоогүй юм байна. Яагаад гэвэл хэн нэгэнд гомдсоныхоо төлөө хэн нэгэнд хувь заяагаа даатгах, өгөх гэж байгаа юм бол тэгж ярьж байгаа залууг хохь чинь ээ л гэнэ. 40 настай тэр хүн харамсалтай нь, дарангуйлал ямар байдгийг мэдэхгүй, үзээгүй. Жишээ нь, манай хажуугийн байрны жүдо Цогоо гэдэг залуу 30 ам.доллар солиулсныхаа төлөө гурван жил шоронд орсон. 30 ам.долларын наймаа хийснийхээ төлөө. Японы жуулчнаас авснаасаа болоод гурван жилээр шоронд орсон. Р.Чойном гэдэг яруу найрагч Монгол Улсаа дуулсныхаа, Ю.Цэдэнбал яагаад бусдын гар хөл болоод байдаг юм гэснийхээ төлөө 3.6 жилийн хоёр ял эдэлсэн. Танай үеийнхэн хариуцлагаа өөрсдөөсөө зугтаалгах гэж байна.

Та нар хариуцлагаас зугтаах амархан. Яагаад гэхээр дарангуйллыг үзээгүй учраас. Та нар зах зээлд саван байхгүй байхад нь Буд гэдэг шинийг санаачлагч хийж зарахад нь шоронд хорьсон. Картын бараанд байсан үе. Үүнийг та нар үзээгүй. Би ч гэсэн жоохон хүүхэд явж байхдаа хөрөнгөтний үзэл суртал тараасан хэргээр үсээ хайчлуулаад, өмдөө уруулаад цагдаагийн байгууллагаар шалгуулаад явж байсан. Үзээгүй учраас ихэрхэж байна. Би хотын дарга байхдаа жагсаалаа чөлөөтэй хийгээрээ л гэдэг байсан. Анх удаа буруу, зөв хүрдтэй машин явуулах эсэхийг асуусан. Хэзээ иргэдээсээ юм асууж байсан юм. Дандаа даргалж, засаглаж байсан. Одоогийн залуучууд чанга гартай болохыг хүссэндээ хэн нэгнийг буруутгаж байгаа юм.

Ц.Элбэгдорж, Х.Баттулга хоёр бол надаас ч илүү найзууд. Бид гурав найзууд. Х.Баттулгатай сонгуулийн дараа уулзсан. Түүнээс хойш уулзаагүй. Миний хувьд Х.Баттулгын хэд хэдэн мэдэгдлийг үзээд цочирдсон. Найзыгаа тэгж хэлэхээр цус харвачих шахсан. Жишээ нь, ОХУ Украинаас Крымыг булааж авахад Х.Баттулга баяр хүргэсэн. Том гүрэн жижиг орноос юм булааж авахад хэзээ ч баяр хүргэдэггүй юм. Яагаад гэвэл НҮБ дээр очоод нүүргүй болдог юм. Хойд Солонгосоос туршлага судалж ирээд цэргийн социализм байгуулна гэсэн. Энэ бол чихэндээ ч итгэхээргүй асуудал. Ерөнхийлөгч болоод бүр ноцтой зүйл хэлж эхэлсэн. Чөлөөт ардчилал мухардсан. Хөгжье гэвэл геополитикоор гэсэн. Геополитикоор жижиг орон тоглодоггүй юм. Том гүрнүүдийн тоглоом. Тусгаар тогтнолоо алдах гээгүй юм түүгээр тоглоод хэрэггүй. Яг үнэнийг хэлэхэд Халхын голын баярын үйл ажиллагаа хуучин цагийг санагалзууллаа. 1990 оноос өмнөхийг. Уучлаарай, Х.Баттулга бид хоёр найз ч гэсэн үнэт зүйл дээр яагаад ч санал нийлж чадахгүй. Сүүлдээ хүмүүсийг санаа бодлоо чөлөөтэй илэрхийлэх асуудлыг хаах гэж байна. Москвад болсон нөхцөл байдалтай давхцаж зарим хүнийг торголоо. Цагдаа нь “Хууль ямар хамаатай юм. Ерөнхийлөгч асуудал тавьчихаад байхад” гэж ярьж байна. Сүмогийн их аварга Д.Дагвадорж хүртэл Сонгинохайрхан дүүрэгт очоод ахыгаа зад шүүмжлээд л явсан. Ах дүү нар ч нэгийгээ шүүмжилдэг. Бидний үнэт зүйл зөрөлдөөд эхэлбэл найзыгаа ч шүүмжилнэ. Ардчиллын эсрэг явах юм бол хэн ч байсан шүүмжилнэ" гэжээ.

С.Сүлд