Дэлхий нийтийн хамгийн тулгамдсан асуудал болох уур амьсгалын өөрчлөлт нь хүний буруутай үйл ажиллагаанаас үүдэлтэй болохыг дэлхий нийтээр хүлээн зөвшөөрч, Уур амьсгалын өөрчлөлтийн тухай НҮБ-ын суурь конвенц, түүний Парисын хэлэлцээрийн хүрээнд дэлхийн дулаарлыг 1.5-2 хэмд хязгаарлах зорилт тавьсан билээ.

Монгол Улс нь Парисын хэлэлцээрийг 2016 онд соёрхон баталсан бөгөөд тус хэлэлцээрийн хүрээнд нийт үндэсний хүлэмжийн хийн ялгарлыг 2030 он гэхэд ямар ч арга хэмжээ авахгүй байх түвшинтэй харьцуулахад 14% бууруулах зорилт тавьсан. Ямартай ч, Парисын хэлэлцээрийн хүрээнд улс орнуудын тодорхойлсон өнөөгийн зорилтууд 2 хэмд барьж чадахгүй байгаа тул НҮБ-ын суурь конвенцийн зүгээс гишүүн улс орнуудыг зорилтоо ахиулж, шинэчлэн тодорхойлон 2020 он гэхэд ирүүлэхийг хүссэн.

Монгол Улс дээрх шаардлагын дагуу өмнө тодорхойлсон зорилтоо шинэчилж “Парисын хэлэлцээрийг хэрэгжүүлэх Үндэсний тодорхойлсон хувь нэмэр (NDC)” барим бичгийг салбар дундын ажлын хэсгийн хүрээнд боловсруулсан.

Уур амьсгалын асуудлаарх салбар дундын зохицуулалтыг хариуцсан Уур амьсгалын үндэсний хороо 2019 оны 11 дүгээр сарын 01-ний өдрийн хуралдаанаараа тус баримт бичиг болон олон улсын Уур амьсгалын ногоон сантай хамтран ажиллах журмын төслийг тус тус хэлэлцэн, батлав.

Үндэсний тодорхойлсон хувь нэмрийн хүрээнд Монгол Улс эдийн засгийн гол салбарууд болох эрчим хүч, хөдөө аж ахуй, барилга, зам тээвэр, аж үйлдвэр, хог хаягдлын салбаруудын түвшинд хүлээмжийн хийн ялгарлыг бууруулах зорилтыг ахиулан тодорхойлсноос гадна мөн уур амьсгалын өөрчлөлтөд дасан зохицох чиглэлээр авч хэрэгжүүлэх тэргүүлэх арга хэмжээнүүдийг тодорхойлоод байна. Монгол Улс болоод дэлхий нийтийн хөгжлийн чиг хандлагад чухал үүрэг гүйцэтгэх уг баримт бичгийг Засгийн газраар хэлэлцүүлэн батлуулж, ирэх оны эхээр НҮБ-ын суурь конвенцийн Нарийн бичгийн газарт хүргүүлэх юм. Түүнээс хойш таван жил тутам үндэсний хүлэмжийн хийн ялгарлыг бууруулах зорилтыг ахиулан тодорхойлж, хэрэгжилтийг тогтмол тайлагнах үүргийг хэрэгжүүлнэ.