Шүүхээс Ерөнхий сайд асан, УИХ-ын гишүүн Ж.Эрдэнэбатыг цагдан хорих шийдвэр гаргасан нь нийгэмд талцал үүсгээд байна. Нэг хэсэг нь шүүхийн зөв гэж буй ч зарим хэсэг нь шүүх хуулийг уландаа гишгэлж байна гэж дүгнэж буй. Өрнөсөн асуудалтай холбогдуулан МАН-аас нэр дэвшигчийнхээ эрхийг хамгаалахаа мэдэгдсэн бол дагаад нэр бүхий улстөрчид цаашлаад ХЭҮК-оос ч гэсэн Сүхбаатар дүүргийн Эрүүгийн хэргийн анхан шатны шүүхэд шаардлага хүргүүлээд буй юм.

Ж.Эрдэнэбатыг цагдан хорих шийдвэрийн хувьд тэрбээр удаа дараа хүндэтгэх шалтгаангүйгээр шүүх хуралд ирээгүй нь шүүхийг үл хүндэтгэсэн үйлдэл гэж тогтоогдсон, цаашлаад 10 тэрбум байршуулах шүүхийн шийдвэрийг биелүүлээгүй учир цагдан хорих шийдвэр гаргасан хэмээсэн. Харин 10 тэрбум төгрөгийн хувьд тухайн гэмт хэргийн нөхцөл байдлаас хамаарсан гэх утгатай тайлбар өгөөд буй юм.

Тэгвэл Ж.Эрдэнэбатыг 10 тэрбумдсан шүүгч Х.Идэр гэж хэн бэ.

Тэрбээр маш олон тэр дундаа нийгэмд дуулиан тарьсан олон хэргийг шүүн тасалж байсан нэгэн. Тухайлбал, Ерөнхий сайд асан Н.Алтанхуягийн зөвлөх Л.Гансүх нарт холбогдох хэргийг шийдвэрлэж байсан. Тухайн үед шүүгдэгч Л.Гансүх ч “Х.Идэр шүүгч АТГ-т барьцаалагдсан” хэмээн мэдэгдэж байсан юм. Жагсаалт С.Зориг Мөн Эрдэнэтийн 49 хувьтай холбоотой хэргээр саатуулагдсан Д.Эрдэнэбилэг тэргүүтэй хүмүүсийг сулласан. Үүний дараа ЗГХЭГ-ын дарга Л.Оюун-Эрдэнэ шүүгч М.Батсуурь болон Х.Идэр нарт сахилгын хариуцлага тооцохоор Ерөнхийлөгчид хандаж байсан. Шалтгаан нь Х.Идэрийн аав Д.Хувьтөгөлдөр нь Эрдэнэт үйлдвэрт ажиллаж байсантай холбоотой.

Гэтэл Эрдэнэттэй холбоотой хэрэгт саатуулагдсан иргэдэд холбогдох хэргийг Х.Идэр шүүсэн нь цаанаа ашиг сонирхолын зөрчилтэй гэж хардсан нь энэ юм. Үүний дараа Ерөнхийлөгч Х.Баттулга нэр бүхий 17 шүүгчид ёс зүйн хариуцлага тооцохоор бүрэн эрхийг түдгэлзүүлсэн. Бүрэн эрхээсээ түдгэлзсэн шүүгч нарын зарим нь гэм буруутай болох нь хуулийн байгууллагын шалгалтаар тогтоогдож хэрэг нь шүүхэд шилжсэн. Харин нэр бүхий дөрвөн шүүгч гэмт хэрэгт холбогдоогүй нь тогтоогдсон учир хэргийг хэрэгсэхгүй болгоод буй юм. Х.Идэр шүүгчийн хувьд эдгээр 17 шүүгчийн жагсаалтал ороогүй ч ЗГХЭГ-ын дарга Л.Оюун-Эрдэнэ болон УИХ-ын нэр бүхий гишүүдийн хараанд ийн өртөж байлаа.

Түүний хувьд Сүхбаатар дүүргийн Эрүүгийн анхан шатны шүүхийн шүүгч ажилладаг. Хар тамхины хэргээр ял эдэлж буй прокурор асан Х.Тамирын дүү, УИХ-ын гишүүн Д.Хувьтөгөлдөрийн хүү гэдгээрээ олонд танигдсан. 

Хэдий ийм ч гэлээ хуулийн салбартаа багагүй нэр хүндтэй олон шагнал хүртэж байсан. 2014 оны долдугаар сард Дүүргийн Эрүүгийн хэргийн анхан шатны I шүүх буюу нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн шүүгчээр томилогдсон шүүгч юм.