Монгол Улсын аварга Э.Оюунболдын нэхэмжлэлтэй шүүх хуралдаан өнөөдөр Захиргааны хэргийн анхан шатны шүүхэд болж, нэхэмжлэлийг бүхэлд нь хэрэгсэхгүй болгож шийдвэрлэжээ.
Тодруулбал, Э.Оюунболд Үндэсний их баяр наадмыг зохион байгуулах хороонд холбогдуулан гаргасан “Үндэсний их баяр наадмыг зохион байгуулах хорооны 2019 оны аравдугаар сарын 24-ний өдрийн 08 дугаартай допингийн шинжилгээний хариутай холбогдуулан авах зарим арга хэмжээний тухай тогтоолын Э.Оюунболдод холбогдох хэсгүүдийг хууль бус болохыг тогтоож, хүчингүй болгуулах”-аар шүүхэд нэхэмжлэл гаргасан юм.
Тэгвэл шүүхээс “Э.Оюунболдын гаргасан нэхэмжлэлийг хянан хэлэлцээд Захиргааны хэрэг шүүхэд хянан шийдвэрлэх тухай хуулийн 106.3, 106.3.14-д заасныг тус тус баримтлан бүхэлд нь хэрэгсэхгүй болгож шийдвэрлэлээ. Тодруулбал, нэхэмжлэгч Э.Оюунболд нь сэргээшийн төрлийн хориотой эм, бэлдмэл хэрэглэсэн болох нь БНСУ-ын итгэмжлэгдсэн лабораторийн дүгнэлтээр нотлогдож байна гэж үзсэн. Иймд Үндэсний баяр наадмыг зохион байгуулах хороонд хуульд заасан эрх хэмжээнийхээ хүрээнд Э.Оюунболдын бариладж давсан даваа бүрийг хүчингүйд тооцох, барилдах эрхийг хоёр жилийн хугацаагаар хасаж, түүнд өвдөг шороодсон бөхчүүдийн даваа бүрийг ахиулж, цол чимэгийг олгуулах, Монгол Улсын аварга цолыг хураах саналыг Ерөнхийлөгчид өргөн мэдүүлэх нь холбогдох хуульд нийцсэн байна гэж дүгнэсэн" гэлээ.
Э.Оюунболд шүүхийн шийдвэр гарснаас 14 хоногийн дотор Захиргааны хэргийн давж заалдах шатны шүүхэд гомдол гаргах эрхтэй юм.
А.Сүх
Сэтгэгдэл (8)