Сүүлийн үед барилга, байгууламжийн галын аюулгүй байдлыг хангаагүй, дур мэдэж барилгын бүтцийг өөрчилснөөс бол гар түймэр ихээр гарах болсон. Тиймээс Онцгой байдлын ерөнхий газраас Төрийн тусгай хамгаалалттай барилга байгууламжид гамшгаас хамгаалах болон гал түймрийн улсын хяналтыг хэрэгжүүлэх төлөвлөгөөт бус хяналт шалгалтыг зохион байгууллаа.
Хяналт шалгалтыг “Их тэнгэр” цогцолбор харш, “Ерөнхийлөгчийн өргөө”, Засгийн газрын II /А-Е корпус/, III, IV, V, VI, IX, XI, XII, XIII, XIV байруудад байрлах Барилга, хот байгуулалтын яам, Мэргэжлийн хяналтын ерөнхий газар, Байгаль, орчин аялал жуучлалын яам, Уул уурхай хүнд үйлдвэрийн яамн, Сонгуулийн ерөнхий хороо, ШӨХТГ, Сангийн яам, Хөдөлмөр, нийгмийн хамгааллын яам, ХЗДХЯ, Хүнс, хөдөө аж ахуй, хөнгөн үйлдвэрийн яам, Гадаад харилцааны яам, ЭХЯ, Санхүүгийн зохицуулах хороо, Үндэсний аудитын газар, Үндэсний Дата төв зэрэг байгууллагуудын барилга байгууламжийг шалгалтад хамруулахад 78 зөрчил дутагдлыг илрүүлсэн байна.
Шалгалтын явцад газар дээр нь 11 зөрчлийг арилгуулан, бусад зөрчлийг арилгуулахаар Засгийн газрын байр хариуцсан холбогдох албан тушаалтан, яамдуудад Гал түймрийн улсын хяналтын байцаагчийн танилцуулгыг хүргүүлэхээр ажиллаж байгаа юм.
Гамшгаас хамгаалах төлөвлөгөөний боловсруулалт дутуу, төлөвлөгөөний тодотгол бүрэн хийгдээгүй, гамшгаас хамгаалах хууль тогтоомж, эрх бүхий байгууллага, албан тушаалтнаас гаргасан шийдвэрийг хэрэгжүүлж ажиллаагүй, объектын аюулгүй байдлыг хангуулах чиглэлээр шаардагдах хөрөнгийн эх үүсвэрийг төлөвлөөгүй, барилга байгууламжид зарлан мэдээлэх ба нүүлгэн шилжүүлэлтийн тоног төхөөрөмж, систем төлөвлөөгүй, гал түймрээс хамгаалах тоног төхөөрөмж, анхан шатны багаж хэрэгсэл зэрэгт техникийн үйлчилгээ хийж, ашиглалтын бэлэн байдлыг бүрэн хангаагүй.
Мөн галын аюулгүй байдлын тухай хуулийн холбогдох заалтыг зөрчиж барилга байгууламж, объектын хийц бүтээцийг өөрчлөх, өргөтгөл хийх зураг төслийг зохиоход галын аюулгүй байдлын норм, нормативын шаардлагыг дагаж мөрдөөгүй, авралтын зам гарцыг хаасан, гал унтраах автомат төхөөрөмж болон галын дохиоллын систем суурилуулаагүй, суурилуулсан боловч ажиллагааны бэлэн байдал, засвар үйлчилгээ хийж ажиллаагүй зэрэг нийтлэг зөрчил илэрчээ.
Сэтгэгдэл (1)