Барилга хот байгуулалтын сайд асан З.Баянсэлэнгэ нь сайдаар ажиллах хугацаандаа “Бэрэн” группийн барьсан Хангай хотхоны орон сууцнаас тендер зарлалгүй, 123 айлын орон сууцыг шууд худалдан авч, улсад 972.4 сая төгрөгийн хохирол учруулсан гэх хэрэгт холбогдоод буй.
Тодруулбал, нийслэлийн Прокурорын газраас сайд асан З.Баянсэлэнгэ, тус яамны Үл хөдлөх хөрөнгийн зах зээл, гадаадын хөрөнгө оруулалтын хэлтсийн даргаар ажиллаж байсан Ж.Бурмаа, мөн яамны Төрийн захиргаа удирдлагын газрын даргаар ажиллаж байсан М.Болортуяа нарт 2002 оны Эрүүгийн хуулийн тусгай ангийн 263 дугаар зүйлийн 263.2 /төрийн албан тушаалтан албаны эрх мэдэл буюу албан тушаалын байдлаа урвуулах гэмт хэрэгт/ яллах дүгнэлт үйлдэж ирүүлсэн. Мөн М.Болортуяад 2015 оны Эрүүгийн хуулийн 22.5 дугаар зүйлийн 22.5-3 /хахууль өгөх/ гэмт хэрэгт яллах дүгнэлт үйлдэж, хэргийг шүүхэд шилжүүлсэн билээ. Шүүх хэргийг 2019 оны арванхоёрдугаар сарын 6-ны өдөр хүлээн авч, гэм буруугийн шүүх хурлыг 2020 оны гуравдугаар сарын 4, 5-ны өдөр хийсэн боловч хэргийг нэмэлт мөрдөн байцаалтад буцаах шийдвэр гаргасан юм.
Одоогоор хэрэгт нэмэлт мөрдөн шалгах ажиллагаа хийгдэж байгаа бөгөөд шүүхэд хэзээ шилжүүлэх эсэх нь тодорхойгүй байна.
Сэтгэгдэл (2)