УИХ-ын гишүүн асан Б.Ундармаад холбогдох хэргийн шүүх хурал өнөөдөр болох байсан ч хойшлогджээ. Б.Ундармаа өмнөх хоёр өмгөөлөгчөөс татгалзаж, шинээр өмгөөлөгч авсан байна. Уг өмгөөлөгч хавтаст хэргийн материалтай танилцах хүсэлт гаргасныг шүүх хүлээн авч хойшлуулсан байна.

Түүнд холбогдох хэргийн шүүх хурлыг 2020 оны долдугаар сарын 31-ний 12:00 цагт хийхээр болжээ. Нийслэлийн прокурорын газраас Эрүүгийн хуулийн тусгай ангийн 22.1 дүгээр зүйлийн 22.1-3 дахь хэсэгт заасан гэмт хэрэгт холбогдуулан Б.Ундармаад яллах дүгнэлт үйлдэн шүүхэд ирүүлсэн байна.

Түүнийг Жижиг, дунд үйлдвэрлэлийг хөгжүүлэх сангаас хөрөнгө орлогын мэдүүлэгтээ дурдсан "Доктор МЭИК" компаниараа дамжуулан 700 сая төгрөгийн зээл авсан хэрэгт холбогдуулан 2018 оны арванхоёрдугаар сараас Авлигатай тэмцэх газарт шалгаж эхэлсэн юм. Тус сангаас зээл авсан хэрэгт холбогдон яллагдагчаар татагдсан Б.Ундармаа нарын дөрвөн гишүүний бүрэн эрхийг түдгэлзүүлэх саналыг тухайн үеийн Улсын ерөнхий прокурор М.Энх-Амгалан УИХ-д оруулсан. Гэвч Их хурлын гишүүд Б.Ундармаа, Л.Энхболд, Г.Солтан, Д.Дамба-Очир нарын бүрэн эрхийг түдгэлзүүлэлгүйгээр шалгах нь зүйтэй гэж үзсэн юм. 

АТГ-аас өгсөн мэдээллээр УИХ-ын гишүүн Г.Солтан, Д.Дамба-Очир нарт холбогдох хэргийг шүүхэд шилжүүлээд буй. Харин Б.Ундармааг хэргийн материалтай танилцуулснаар түүний холбогдсон хэргийг шүүхэд шилжүүлэхэд бэлэн болно. Ийнхүү ЖДҮХС-гаас зээл аван, яллагдагчаар татагдсан дөрвөн гишүүнээс Л.Энхболдын хэрэг мөрдөн байцаалтын шатанд үлдээд байгаа юм.