Тагнуулын ерөнхий газар, Эрүүгийн цагдаагийн албаныхан өнгөрсөн 2019 оны сүүлчээр гурван дүүрэгт нэгэн зэрэг гүйцэтгэх ажиллагаа явуулж, нэр бүхий таван зочид буудлаас 800 гаруй хятад иргэнийг баривчлан саатуулсан билээ. Тэдгээрийг цахим луйврын хэрэгт буруутгасан ба мөнгө угаах зорилготой байсныг нь Тагнуулын ерөнхий газрын дарга асан Д.Гэрэл тухайн үед баталж байлаа. Тэрбээр өнгөрсөн оны аравдугаар сарын 29-ний өдрийн Засгийн газрын хуралдаанд хэргийн талаарх мэдээллийг өгч, БНХАУ-ын иргэд мөнгө угаасныг баталсан. Зохион байгуулсан хүн нь ч тодорхой байгаа. Хятад иргэдийн 100-гаад компьютер, 10 мянга орчим гар утасны сим ашиглаж байсныг хураан авсан. Мөрдөн шалгах ажиллагааг үргэлжлүүлэн нарийвчлан хийнэ гэж байв. Хятад иргэд жуулчны визээр хэсэг бүлгээрээ Монголд орж ирж байсныг тагнуулынхан анхнаас нь мэдэж байснаа ч хэлж байлаа. Хэргийг зохион байгуулсан гэх хятад иргэдийг сэжигтнээр татан саатуулж, бусдыг нь Монгол Улсаас албадан гаргасан юм.
Дуулиант уг хэргийг мөрдөн шалгах ажиллагаа 10 гаруй сарын хугацаанд үргэлжлэн дууссан ба урьдчилсан хэлэлцүүлэг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд маргааш болно.
Сэжигтнүүдийг цахим мэдээлэлд хууль бусаар халдсан, мөнгө угаах, зохион байгуулалттай гэмт бүлэг байгуулах, түүнд элсэх, залилах гэмт хэрэгт Нийслэлийн прокуророос яллах дүгнэлт үйлджээ. Үүнийг сийрүүлбэл, Нийслэлийн Прокурорын газраас Эрүүгийн хуулийн ерөнхий ангийн 1.6 дугаар зүйлийн 4 дэх хэсэг, 3.1 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 26.1 дүгээр зүйлийн 4 дэх хэсгийн 4.1 дэх хэсэг /Цахим мэдээлэлд хууль бусаар халдах/, Эрүүгийн хуулийн ерөнхий ангийн 3.1 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 18.6 дугаар зүйлийн 3 дахь хэсэг /мөнгө угаах/, Эрүүгийн хуулийн ерөнхий 3.1 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 20.3 дугаар зүйлийн 1 дэх хэсэг /Зохион байгуулалттай гэмт бүлэг байгуулах, түүнд элсэх/, Эрүүгийн хуулийн ерөнхий ангийн 2.8 дугаар зүйлийн 1 дэх хэсэг, 3.1 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 17.3 дугаар зүйлийн 3 дахь хэсгийн 3.1, 3.3 дахь /залилах/ хэсэгт заасан гэмт хэрэгт тус тус холбогдуулан Бүгд Найрамдах Хятад Ард Улсын иргэн Лью Тинг Хуа /Liu Ting Hua/, Жун Хуа /Zhong Hua/, Еэ Тин /Ye Ting/ нарт, Эрүүгийн хуулийн ерөнхий ангийн 3.1 дүгээр зүйлийн 1, 3.2 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 18.6 дугаар зүйлийн 3 дахь хэсэг /мөнгө угаах/, Эрүүгийн хуулийн ерөнхий ангийн 3.2 дугаар зүйлийн 1, 3.3 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 20.3 дугаар зүйлийн 2 дахь хэсэг /Зохион байгуулалттай гэмт бүлэг байгуулах, түүнд элсэх/ , Эрүүгийн хуулийн ерөнхий ангийн 2.8 дугаар зүйлийн 1 дэх хэсэг, 3.1 дүгээр зүйлийн 1, 3.2 дугаар зүйлийн 1 дэх хэсэгт заасныг тус тус журамлан, мөн хуулийн тусгай ангийн 17.3 дугаар зүйлийн 3 дахь хэсгийн 3.1, 3.3 дахь /залилах/ хэсэгт заасан гэмт хэрэгт тус тус холбогдуулан Бүгд Найрамдах Хятад Ард Улсын иргэн Жан Хун Чан /Zhang Hong Chang/, Вула /Wula/, Ли Жиa Сэнг/ Li Jia Seng, Ниу Жи Хэнг /Niu Zhi Heng/, Ю Жи /Yu Zhi/, Жау Донг Линг /Zhao Dong Ling/, Пан Жин /Pan Jin/, Лю Жун Вэй /Liu Jun Wei/, Ян Гуй /Yan Gui/, Бай Жун Лиан /Bai Jun Liang/, Ли Янг /Li Yang/, Лю Чианг /Liu Qiang/ нарт тус тус яллах дүгнэлт үйлдэж ирүүлсэн байна.