Ард түмний итгэлийг хүлээж, төр түшилцэж явсан эрхмүүд зөөлөн сэнтийд заларч байхдаа албан тушаалаа урвуулан ашиглаж, олон тэрбум төгрөг “зооголдог”, хамаарал бүхий хүмүүсээрээ дамжуулан идэж, уудаг жишиг тогтоод удаж байгаа. Тэдний тод жишээ нь ЖДҮ-чид. Түүний буухиаг залгамжилж, шуугиан тарьсан хөрөнгө мөнгөний асуудал нь УИХ-ын гишүүн асан Д.Оюунхоролтой холбоотой дуулиан байсан.

Нэг хэсэг сураг алдраад байсан эл асуудал дахин олны анхаарлыг татаж эхлэв. Улсад нэг тэрбум 900 сая төгрөгийн хохирол учруулсан гэх хэрэгт нэр холбогдоод байсан сайд асан Д.Оюунхорол ялагдагчаар шалгагдаж байхдаа оргон зайлсан уу гэх шуугиан дахин хөврөх боллоо.

БОАЖ-ын сайд асан Д.Оюунхорол нөхөртэйгээ хамт Хонконг руу шууд нислэгээр явсан болохыг албан бус эх сурвалж мэдээлэв.

Тодруулбал Д.Оюунхорол өнгөрсөн есдүгээр сарын 17-ны өдөр Чингис хаан олон улсын нисэх буудлаас Хонконг руу ниссэн байна. Түүний нөхөр дипломатч Г.Жаргалсайхан нь Хонконгд суух Ерөнхий консул бөгөөд Монголд ирээд коронавирусийн улмаас буцаж чадаагүй байсан аж. Харин Улсын Онцгой комиссоос коронавирусийн үед авах арга хэмээний дэглэмээ сулруулсантай холбоотойгоор ийнхүү хил нэвтэрсэн гэдгийг албан бус эх сурвалж мэдээлсэн юм.

Харин БОАЖ-ын сайд асан Д.Оюунхоролыг гэмт хэрэгт холбогдон яллагдагчаар татагдаад байхдаа оргон зайлсан уу гэх таамаг олон нийтийн дунд хөврөөд байгаа юм.

Тодруулбал БОАЖЯ-ны Хүрээлэн буй орчин, байгалийн нөөцийн удирдлагын газрын дарга Г.Нямдавааг албаны эрх мэдлээ урвуулан ашиглаж, хууль тогтоомж зөрчин, бусдад давуу байдал олгосны улмаас улсын төсөвт нэг тэрбум 900 гаруй сая төгрөгийн хохирол учруулсан хэрэгт холбогдуулан шалгаж байгаа. Г.Нямдаваагийн холбогдсон хэрэгт сайд асан, Д.Оюунхоролыг яллагдагчаар татсан байх магадлалтай аж. Тэднийг эрх мэдлээ урвуулж, Төсвийн, Барилгын, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль зөрчсөн хэмээн буруутгаж буй гэх.

АТГ-аас өнгөрсөн хавар БОАЖЯ-ны эрх бүхий албан тушаалтнуудыг Төсвийн тухай хуульд “Төсвийг үр ашигтай, хэмнэлттэй байхаар төлөвлөж, зарцуулах”, Барилгын тухай хуульд “Барилгын ажлыг зураг төсөвгүйгээр гүйцэтгэхийг хориглоно” гэх заалтыг зөрчиж, “Гранд повер” гэх компанид давуу байдал олгосон хэмээн шалгаж байгаа гэдгийг мэдэгдэж байсан.

“Гранд повер” гэх компани нь нүүрснээс хий гаргах өөрийн үйлдвэргүй атлаа Хилийн цэргийн 0151 дүгээр ангийн халаалтын зуухыг хийгээр ажилладаг болгох гэрээ байгуулсан бөгөөд тус компанид давуу байдал олгосны улмаас улсад нэг тэрбум 900 сая төгрөгийн хохирол учруулсан хэмээн шалгаж байгаа юм.

Тухайн үед БОАЖ-ын сайд О.Оюунхорол байсан бөгөөд түүнийг эл хэрэгт ялагдагчаар татан шалгаж байх магадлал өндөр гэдгийг хэлэх хүн олон байгаа юм. Харин түүнд хилийн хориг тавиагүй учир Ерөнхий сайд асан Ч.Сайханбилэгийн адилаар оргон зайлсан уу гэх хардлага олон нийтийн дунд хөвөрч, дахин олны анхаарлыг татаад байгаа юм. Ямартай ч бид энэ талаар эргэн мэдээлэх болно.

Б.Баатар