“Жаст групп” ХХК-ийн захирал Ш.Батхүү, “Алтжин групп” компанийн захирал Г.Алтан болон түүний хүү Э.Сүрэн, “Эрдэнэт үйлдвэр”-ийн гүйцэтгэх захирал асан Г.Чинзориг, тус үйлдвэрийн Хуулийн хэлтсийн дарга асан Б.Мөнхжаргал, Худалдааны хэлтсийн даргаар ажиллаж байсан Г.Амарбат нарт холбогдох хэргийг Хан-Уул, Сонгинохайрхан дүүргийн Эрүүгийн хэргийн анхан шатны шүүх өнөөдөр үргэлжлүүлэн зургаа дахь хоногтоо хэлэлцэж байна.

Ш.Батхүүгийн хувьд хуурамч бичиг баримт үйлдэн “Эрдэнэт үйлдвэр”-ийг барьцаалж, Өмнөд Африкийн “Стандарт” банкнаас их хэмжээний зээл авсан хэрэгт холбогдсон бөгөөд 109 сая ам.долларынхаа дийлэнхийг “Монгол газар” ХХК-иас “Олон овоот гоулд”-даа алтны уурхайн хайгуулын болон ашиглалтын тусгай зөвшөөрөл авах, уг ордод үйл ажиллагаа явуулахад зарцуулсан байдаг. Хэргийг шалгах явцад хууль хяналтынхан 98 тэрбум төгрөгөөр үнэлэгдэх хөдлөх болон үл хөдлөх хөрөнгийг битүүмжилсэн аж.

Мөн “Олон овоот гоулд” ХХК-ийн эзэмшлийн хайгуулын тусгай долоон зөвшөөрлийг нь прокурорын байгууллагынхан төр, нийтийн эрх ашгийг хамгаалах хуулиар олгосон эрхийнхээ дагуу цуцлуулж, төрд буцаан авахаар болжээ.

У.Тэргэл