Ерөнхий сайд асан Ж.Эрдэнэбат нарт холбогдох хэргийг Баянзүрх, Сүхбаатар, Чингэлтэй дүүргийн шүүх хэлэлцэн, түүнийг гэм буруутайд тооцож, зургаан жилийн хорих ял оноосон билээ. Яллагдагч болон түүний өмгөөлөгчид анхан шатны шүүхийн шийдвэрийг үл зөвшөөрөн давж заалдахаар болсон юм.

Харин Давж заалдах шатны шүүх хуралдаан есдүгээр сарын 15-нд болж, анхан шатны шүүхээс оноосон ялыг хэвээр үлдээлээ.

Шүүхийн тогтоол хүчин төгөлдөр болсон тул Ж.Эрдэнэбатыг ШШГЕГ-ын харьяа 437 дугаар хорих анги руу шилжүүлсэн ба уг хорих анги нь Эрдэнэт хотын нутаг дэвсгэрт байрладаг аж.

Мөн УИХ-ын гишүүн, Хөдөлмөр, нийгмийн хамгааллын сайд асан Н.Номтойбаярт анхан шатны шүүхээс оноосон 5,5 жилийн хорих ялыг Давж заалдах шатны шүүх хэвээр үлдээсэн тул түүнийг мөн ШШГЕГ-ын харьяа 417 дугаар хорих анги руу нь шилжүүлсэн юм. Энэхүү хорих анги нь Төв аймгийн Мөнгөнморьт суманд байдаг аж.