Коронавирусний халдварыг дотооддоо алдсанаас арваннэгдүгээр сарын 11-нээс бүх нийтийн бэлэн байдлын зэрэгт шилжүүлсэн билээ. Энэ үeэр дагаж, мөрдөх тодорхой арга хэмжээг авч, үүний дотор архи, согтууруулах ундаа худалдаалахыг хориглосон.

Гэтэл хориглосноос хойш эрүүлжүүлсэн хүний тоо өдрөөс өдөрт нэмэгдэж, согтуугаар автомашин жолоодсон, гэр бүлийн хүчирхийлэл үйлдсэн, танхайрсан гэмт хэргийн дуудлага буурах нь байтугай өсөх хандлагатай байна. Хөл хорио тогтоогоод удаагүй байхад 89 хүн, энэ тоо явсаар уржигдар 110, өчигдөр 126 хүнийг эрүүлжүүлжээ. Архи, согтууруулах ундааг хориглочихоод байхад эрүүлжүүлсэн хүний тоо буурахгүй харин ч эсрэгээрээ өссөөр байгаа нь архины хууль бус худалдаа хүчээ авч, далд хэлбэрт шилжсэний илрэл юм.

Нэгэн иргэн "Ланд круйзeр-200" маркийн автомашинд согтууруулах ундаа дүүртэл нь аччихаад зарж, борлуулж байсныг цагдаагийнхан илрүүлсэн билээ. Архи, шар айргийн хууль бус далд худалдаа газар авсны баталгааг өдрөөс өдөрт нэмэгдэж буй эрүүлжүүлсэн хүний тооноос харж болно.

Согтуугаар ар гэртээ агсам тавьсан дуудлага өдөрт 50-иас буурахгүй иржээ. Илэрч, мэдэгдсэн нь энэ. Харин далд хэлбэрт хүчирхийлэл хэрхэн гаарч буйг хэн ч мэдэхгүй юм. Сүүлд гэхэд л, агсам тавьсан нөхрөө цагдаад өгснийхөө төлөө гарт нь хэрцгийгээр амиа алдсан харамсалтай хэрэг гарсан билээ.

Хууль хүчний байгууллага хэдийгээр ачаалалтай ажиллаж байгаа ч шагийн архины далд бизнeсийг таслан зогсоох тодорхой арга хэмжээ авахгүй бол улам чангарч, эцэстээ хүний амь эрсдэхэд ойрхон байна.

У.Тэргэл