УИХ-ын гишүүн асан Б.Ундармаа Жижиг, дунд үйлдвэрлэлийг хөгжүүлэх сангаас хөрөнгө, орлогын мэдүүлэгтээ дурдсан "Доктор МЭИК" компаниараа дамжуулан 700 сая төгрөгийн зээл авсан хэрэгт холбогдуулан 2018 оны арванхоёрдугаар сараас Авлигатай тэмцэх газраас шалгаж эхэлсэн юм.  Эл хэрэгт нь Нийслэлийн прокурорын газраас түүний нийтийн албанд томилогдох эрхийг 5-8 жил хүртэлх хугацаагаар хасах, арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгүүлэхээр яллах дүгнэлт үйлдсэн байдаг.

Анхан шатны шүүхээс Б. Ундармааг гэм буруутайд тооцон 2,6 жилийн хорих ял оноосныг шүүгдэгч болон түүний өмгөөлөгч үл зөвшөөрөн давж заалдсан юм. Харин Давж заалдах шатны хуралдаанаас Б.Ундармаад 40 сая төгрөгийн торгууль ногдуулан улмаар сулласан билээ.

Тэгвэл Нийслэлийн прокуророос ял хөнгөдсөн гэдэг үндэслэлээр Дээд шүүхэд эсэргүүцэл бичиж, Давж заалдах шатны шүүх хуралдааныг дахин хийхийг хүссэн байна. Дээд шүүх прокурорын эсэргүүцлийг хүлээн авч Давж заалдах шатны шүүх дахин хуралдах уу эсвэл, хүлээн авахгүйгээр шийдвэрийг хэвээр үлдээх үү гэдгийг ойрын үед хуралдан шийдэхээр болж байна.