"Эрэл"-ийн Б.Эрдэнэбатад холбогдох хэргийг Нийслэлийн эрүүгийн хэргийн давж заалдах шатны шүүхээр хэлэлцэж, түүнд авсан таслан сэргийлэх арга хэмжээг өөрчилж хилийн хориг, хувийн баталгаа гаргах таслан сэргийлэх арга хэмжээ авахаар болсон талаар эх сурвалж мэдээллээ. 

Тодруулбал, Шүүх бүрэлдэхүүн хэргийг хэлэлцээд анхан шатны шүүхийн шийдвэрийг бүхэлд нь хүчингүй болгож, хэргийг нийслэлийн Прокурорын газарт буцаасан байна. Анхан шатны шүүхээс шүүгдэгч Б.Эрдэнэбатыг залилах гэмт хэргийг “Хуурч, зохиомол байдлыг зориудаар бий болгох, бусдад их хэмжээний хохирол” учруулсан, мөн мөнгө угаах гэмт хэргийг “Гэмт хэргийн улмаас олсон хөрөнгө, мөнгө, орлого гэдгийг мэдсээр байж байнга тогтвортой үйлдсэн гэм буруутайд тус, тус тооцож долоон жилийн хорих ял оногдуулж, ялыг нээлттэй хорих ангид эдлүүлэхээр, шүүгдэгч  Д.Сэргэлэнг гэмт хэрэгт хамтран оролцсон, бүлэглэсэн нь нотлогдон тогтоогдохгүй, гэмт хэргийн шинжгүй байна гэж үзэн хэргийг хэрэгсэхгүй болгож цагаатгасан юм.

Б.Эрдэнэбатад холбогдох хэрэгт иргэний гэрээний маргаан мөн эсэхийг прокуророос шалгаагүй, нотолбол зохих байдлуудыг нотлоогүй, хэрэгт хийгдэх ажиллагааг нэг мөр хийгээгүй, яллаж байгаа үндэслэл нь хууль зүйн үндэслэлгүй гэж дүгнэж шийдвэрлэсэн аж.

Б.Баатар