Улаанбаатар Төмөр замын ХХН-ийн дарга асан Л.Пүрэвбаатарт холбогдох хэргийг шүүх хурал өчигдөр болж, түүний хэргийг өршөөлийн хуульд хамааруулж эрүүгийн хариуцлагаас чөлөөлсөн талаар бид мэдээлсэн билээ.

Тодотговол, шүүхээс шүүгдэгч Л.Пүрэвбаатарыг гэмт хэрэг үйлдсэн гэм буруутайд тооцсон. Улмаар өршөөлийн хуулиар  эрүүгийн хариуцлагаас чөлөөлсөн байдаг.

Учир нь шүүгдэгч Л.Пүрэвбаатар нь 13.930.443 төгрөгийг хохирогч тал болох УБТЗ-ХХН-т нөхөн төлж хохирлоо барагдуулсан байна. Мөн хэрэг хянан шийдвэрлэх ажиллагааны зардалд тооцож шинжээчийн хөлс болох 2.688.000 төгрөгийг Монголын мэргэшсэн хөрөнгийн үнэлгээний институтад төлөх шийдвэрийг шүүхээс гаргасан билээ.  

Хэргийг эргэн сануулахад Л.Пүрэвбаатар нь УБТЗ ХНН-ийн даргаар ажиллаж байхдаа 2015 оны нэгдүгээр сарын 23-ны өдөр  эхнэрийнхээ захирлаар нь ажилладаг “Нимонс” ХХК-ийн эзэмшлийн 00-36 УНТ улсын дугаартай 2011 онд үйлдвэрлэгдэж, 2012 оны дөрөвдүгээр сарын 03-ны өдөр орж ирсэн хуучин “Лексус 570” маркийн суудлын автомашиныг 153 сая төгрөгөөр буюу зах зээлийн ханшаас хэтэрхий өндөр үнээр худалдан авч байгууллагадаа хохирол учруулсан хэрэгт буруутгагдаж байсан юм.

Ямартай ч тэрбээр толгойлж байсан байгууллагынхаа хохирлыг барагдуулсан учир ийнхүү ялаас хэлтрэв.

Харин дээрх мэдээлэл нь олны дургүйцлийг төрүүлж, цахим орчинд шүүмжлэл дагуулж байна. Тухайлбал “Сүүлийн жилүүдэд эрх мэдэл, албан тушаалтнууд төрийн мөнгө “идэж”, тансагладаг явдал газар авсан. Үүнийг нь хуульд хяналтын байгууллагаас шалгаж тогтоодог ч эцэстээ хохирол гэх хэдхэн төгрөг төлчихөөд ялаас мултарч байна. Ийм байхад цагаан захтнуудын хэрэг гарсаар, газар авсаар байх болно. Хуулиа чангатгаж гэмээнэ төрийн мөнгөөр тоглох явдал буурна" гэдгийг хэлж байгаа юм.

Б.Баатар