Т.Энхсайхан, Д.Отгонбаяр нарт холбогдох зөрчлийг хэргийг шүүх хуралдаан өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болов. Улмаар шүүх бүрэлдэхүүн хэрэгт хэрэг бүртгэлтийн нэмэлт ажиллагаа хийлгэхээр хэргийг Баянзүрх дүүргийн цагдаагийн нэгдүгээр хэлтэст буцааж шийдвэрлэсэн байна. 

Хэргийг эргэн сануулахад, Т.Энхсайхан, Д.Отгонбаяр нар нь 2020 оны арванхоёрдугаар сарын 2-ны өдөр "Нарантуул" Олон улсын худалдааны төвийн гадна жагсаал цуглаан зохион байгуулж, Ерөнхий сайдыг шүүхэд өгч буйгаа мэдэгдэж байсан юм.

Тухайн үед коронавирусний цар тахалтай холбоотойгоор бүх нийтийн бэлэн байдлын зэрэгт шилжиж, хатуу хөл хорио тогтоосон байсан учраас тэднийг Зөрчлийн тухай хуулийн 5.8 дугаар зүйлийн 1 /Хуулиар хориглосон газарт, эрх бүхий байгууллагад бүртгүүлэлгүйгээр, эсхүл мэдэгдэл хүргүүлснээс хойш хуульд заасан хугацаа өнгөрөөгүй байхад жагсаал, цуглаан зохион байгуулсан, эсхүл жагсаал, цуглааны явцад түүний зорилгыг өөрчилж хориглосон жагсаал, цуглаан зохион байгуулсан/, мөн хуулийн 5.13 дугаар зүйлийн 2 / Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн дэглэм зөрчсөн /-дахь хэсэгт тус тус зааснаар зөрчлийн хэрэг үүсгэсэн юм.

Б.Баатар