Сүхбаатарын талбай дээр өнөөдөр 13.32 цагийн орчимд нэг иргэн өөрийгөө шатааж, амиа алдсан хэрэг гарсан талаар бид өмнө нь мэдээлсэн билээ.

Тэгвэл энэ талаар Цагдаагийн ерөнхий газрын Хэвлэл мэдээллийн  төвийн дарга, цагдаагийн дэд хурандаа Б.Баатархүү "Тухайн хэрэг 13.32 цагийн орчимд болсон байсан. Одоогоор камерын бичлэг шүүж, ой орчимд нь байсан иргэдээс мэдээлэл авч байна. Амь хохирогчийн цогцосыг шүүх эмнэлгийн задлан шинжилгээнд хүргэсэн. Талийгаачийн биеэс 1987 онд төрсөн Э гэгч хүний бичиг баримт гарч ирсэн. Энэ бичиг баримт өөрийнх мөн эсэхийг нягтална. Хэн болохыг нь эцэслэн тогтоогоогүй байгаа. Сүхбаатарын талбайд 13.32 минутад үйл явдал болоход тухайн үед ажиллаж байсан цагдаагийн албан хаагч иргэний амь насыг аврах арга хэмжээг түргэн шуурхай авч, өөрөө хөнгөн түлэгдэж эмнэлэгт хүргэгдсэн. Амь хохироогчийн биеэс ямар нэгэн шаардлага бүхий уриа, лоозон, гэрээслэл одоогоор олдоогүй. Хэргийн учир шалтгааныг тогтоохоор мөрдөн шалгах ажиллагааг эхлүүлсэн. Иймд иргэд, олон нийт батлагдаагүй мэдээллийг олон нийтэд түгээхгүй байхыг хүсч байна" гэв.  

Мөн тэрбээр цагдаагийн байгууллагын үйл ажиллагаанд дэмжлэг үзүүлсэн залуучуудад талархал илэрхийлэв. 

Р.Алтан