Дээд лиг болж буй энэ мөчид Дээд лигт өрсөлдөж буй "Ховд-Чандмань" багийн тамирчин А.Хонгорзултай ярилцлаа. Тэрбээр өнгөрсөн есдүгээр сард Энэтхэг улс руу Азийн аварга шалгаруулах тэмцээний урьдчилсан шатны тэмцээнд багаа ахлан оролцсон юм. Энэхүү тэмцээн түүний хувьд ихээхэн туршлага болсон бөгөөд цаашид Азийн аварга шалгаруулах тэмцээнд оролцохыг зорьж буй. Ийнхүү уншигч та бүхэнд залуу тамирчин А.Хонгорзултай ярилцсан ярилцлагыг хүргэе. 

-Энэ өдрийн мэнд хүргэе.

-Баярлалаа, энэ өдрийн мэнд хүргэе. 

-Анх удаа лигт оролцож байгаа гэсэн шүү дээ.  Лигт тоглох мэдрэмж ямар байна вэ?

-Дээд лигт мэргэжлийн түвшинд тоглож байгаа учраас сэтгэгдэл маш өндөр байна. Би арван жилийн сургуулиа төгсөөд шууд дээд лигт тоглох болсондоо баяртай байдаг. Оюутны лигт тоглож үзээгүй шууд лигт тоглох боломж олдсон.

-Хэзээнээс сагсан бөмбөгийн спортоор хичээллэж эхэлсэн бэ? Арван жилдээ тоглодог байсан уу? 

-Тийм ээ. Арван жилдээ сагсан бөмбөг тоглодог байсан. Харин 2020 оноос тууштай хичээллэж эхэлсэн. Хичээллээд гурван жил болж байна.  

-Арван жилийн сургуулиа хаана төгссөн бэ? Хамгийн анхны сагсан бөмбөг заасан багшийнхаа тухай танилцуулахгүй юу? 

-Би Нийслэлийн 24 дүгээр сургуулийг төгссөн. н.Мөнх-Эрдэнэ багш маань надад хамгийн анх сагсан бөмбөг зааж байсан. 

-"Ховд-Чандмань" багт тоглох саналыг хэн тавьсан бэ? Хэрхэн хүлээж авсан бэ?

-Өнгөрсөн жилүүдэд бэлтгэл хийлгэдэг байсан Пүүжээ багш маань анх санал тавьсан. Би энэ жил оюутны лигт тоглох бодолтой байсан ч манай багш энэ багийг дасгалжуулдаг учраас "Ховд-Чандмань" багт тоглох саналыг хүлээн авсан. Энэ багт ороход багш маань нөлөөлсөн. Ингээд л дээд лигт тоглох болсон доо. 

-Ямар сургуульд суралцдаг вэ? Их сургуулийнхаа багаас оюутны лигт тоглох байжээ? 

-Би Анагаахын шинжлэх ухааны үндэсний их сургуульд суралцдаг. Энэ жил нэгдүгээр курс. Сургуулийн лигт нэг л удаа тоглож үзсэн.

-U18 ангилалд FIBA-ын албан ёсны тэмцээнд оролцоод ирсэн сэтгэгдлээ хуваалцахгүй юу? Мэдээж туршлага болсон байх.

-Тийм ээ. FIBA-ын албан ёсны тэмцээнд анх удаа оролцсон учраас маш гоё санагдсан. Тэр тусмаа багаа ахалж явсан учраас өндөр үүрэг хариуцлагатайгаар тэмцээнээ дуусгаад ирсэн. 

-Тамирчин хүнд тулгардаг асуудлууд бий. Тухайлбал, шидэлт нь орохгүй, бэлтгэл хийж байгаа ч хангалттай сайн байж чадахгүй үе байдаг шүү дээ. Энэ үед хэрхэн өөрийгөө зоригжуулж, сэргэлт авдаг вэ? 

-Энэ үед ойр дотнынхоо хүмүүстээ ярилцдаг. Ихэвчлэн дасгалжуулагчтайгаа ярилцаж, юун дээр ажиллах хэрэгтэй байна вэ гэдгээ олж мэдээд бэлтгэлээ үргэлжлүүлдэг дээ. 

-Цаашдын зорилго нь юу вэ? Нууц биш хуваалцахгүй юу? 

-Хамгийн том зорилго гэвэл Монгол улсаа төлөөлж 5х5-ын Азийн аваргад оролцохыг зорьж байгаа.

-Дээд лигт өрсөлдөж буй багуудаас хамгийн хүчтэй өрсөлдөгч нь ямар баг байна вэ?

-Дээд лиг учраас бүр баг яг адил хүчтэй байгаа. Хүчний өрсөлдөгч гэвэл бүх багийг л нэрлэмээр байна. Миний хувьд бүгдээс нь л суралцаж, үлгэр жишээ авдаг. 

-Үлгэр жишээ авдаг, тоглолтуудыг нь үздэг олон тамирчид бий байх. Одоогийн байдлаар ямар хүнээс хамгийн их үлгэр дуурайлал авч байна вэ? 

-Тийм ээ. Олон байгаа. Харин одоо бол багийн эгч нараасаа л хамгийн их үлгэр дуурайл авч байна.

-Хичээлдээ явах, бэлтгэлээ хийх гээд энэ бүгдийг хэрхэн амжуулж байна вэ?

-АШУҮИС-д сурдаг учраас ачаалал арай илүү байдаг. Өглөө, өдөр хичээлээ хийгээд, орой ихэвчлэн  бэлтгэлээ хийдэг. Одоо хичээл амарсан байгаа учраас зохицуулж явахад амар байгаа. 

-Эмэгтэй хүүхэд спортоор хичээллэхэд гэр бүлийнхэн нь шууд сайнаар хүлээж авахгүй байх л даа. Гэр бүлийнхэн нь хэрхэн дэмждэг вэ?

-Анх тоодоггүй байсан. Харин амжилт гаргаад гадаад руу тэмцээнд яваад эхлэхэд намайг маш сайн дэмждэг болсон. Азийн аваргад явахаас өмнө Дэлхийн аваргад бас явсан. Одоо бол манай гэр бүл намайг маш сайн дэмждэг, дээд лигийн тогтолтуудыг хүртэл үздэг болсон. 

-3х3-аар хичээллэж байсан юм билээ. Хэзээнээс эхэлж хичээллэсэн бэ? 5х5, 3х3 төрлүүд асар их ялгаатай шүү дээ. 

-Би 2020 оноос хойш 3х3-аар хичээллэсэн. Дэлхийн аваргад явахын тулд сүүлийн гурван жил тууштай бэлтгэгдсэн. Үүний үр дүнд Дэлхийн аваргын тэмцээнд амжилттай оролцоод ирсэн. 5х5 багийнхаа бүх хүнийг хараад тайван тоглодог. Харин 3x3 тамирчнаас маш их чадвар, хурд, ачаалал даах чадвар шаарддаг юм шиг санагддаг. 

-Тамирчдын хувьд өмсгөлийн номер, хувийн дугаар нь ихээхэн ач холбогдолтой санагддаг. Яагаад 8 номерын өмсгөл өмсөх болсон бэ? 

-Намайг анх сагс сонирхож тоглож эхэлж байх үед сагсчин Э.Чимэддолгор эгч 8 номерын өмсгөлтэй байсан. Гоё тоглолттой тоглогч учраас таалагддаг. Мөн М-Гарьдын О.Эрдэнэцогт ах бас 8 номерын өмсгөлтэй. Магадгүй энэ хоёр хүнтэй холбоотой байх. 

-Багийн спортод дасгалжуулагч маш чухал нөлөө үзүүлдэг шүү дээ. Дасгалжуулагчийн хувьд таныг хэрхэн дэмждэг вэ? 

-Багийнхаа дасгалжуулагчтай олон жил ажиллаж байгаа. Багш намайг маш сайн мэддэг. Тийм ч учраас ойлголцоход амар байдаг.

-Ярилцсанд баярлалаа.

-Баярлалаа. 

Д.Батчулуун