Монгол Улсын Хөдөлмөрийн баатар, Гавьяат тамирчин О.Гүндэгмаатай ярилцлаа. Энэ жил түүний харъяалагддаг Алдар спорт хорооны 80 жилийн ой болж байгаа билээ. 

-Танд энэ өдрийн мэндийг хүргэе. Энэ жил Алдар спорт хорооны 80 жилийн ой тохиож байгаа шүү дээ. Энэ талаар яриага эхэлье. 

-Алдар спорт хорооны тамирчнаар 2000 оноос харъяалагдаж эхэлсэн. 2003 онд цэргийн цол авч байлаа. Тэр цагаас хойш өнөөдрийг хүртэл Алдар спорт хорооны тамирчин, дасгалжуулагчаар ажиллаж байна. 80 жилийн хугацаанд манай байгууллагаас Олимпын есөн медальтан, Үндэсний бөхийн 15 алдартан, Дэлхийн аварга, Азийн аварга гээд маш олон тамирчид төрөн гарсан байдаг. Мөн үндэсний шигшээ баг олимпын багуудын 30-с дээш хувийг манай байгууллагын тамирчид бүрдүүлж ирсэн.

-Та тэгэхээр 20 гаруй жилийн хугацааг Алдар спорт хорооны хамт олонтойгоо өнгөрүүлжээ? 

-Тийм ээ. Энэ хугацаанд би долоон удаа олимпод оролцсон. Энэ амжилтад тамирчин хүн ганцаараа хүрнэ гэж байхгүй л дээ. Миний хувьд Алдар спорт хороонд харъяалагдснаараа бэлтгэл сургуулилт, ар гэртээ санаа зоволтгүй тэмцээн уралдаандаа оролцдог.

Зэвсэгт хүчин гэдэг энэ том байгууллагад харъяалагдаж энэ хүртэл явж ирсэндээ бахархал дүүрэн байдаг. 

-Ойн тоглолт нь хэзээ болох вэ? 

-Манай байгууллагын 80 жилийн ой ирэх сарын 2-ны өдөр болох гэж байна. Байгууллагын төрсөн өдрөөр спортын болон урлагийн  хамтарсан тоглолт болно. Мөн энэ тоглолтод Алдар спорт хороонд маань харъяалагдаж буй бүх тамирчид өөр өөрийн хичээллэдэг спортоо таниулах үйл ажиллагаа болон өөрсдийн үзүүлбэрийг бэлдэж байгаа. 

-Дуу дуулж үзэгчдэд гэнэтийн бэлэг барина гэсэн шүү дээ. Гоцлож дуулах уу? 

-Түүхт ойн дээрээ спортынхонд спортоос өөр авъяас байдаг шүү гэдгээ харуулах зорьж, гэнэтийн бэлэг бэлдсэн.

Олимпын аварга У.Сүрэнжав, МУГТ М.Анхцэцэг, Шатрын их мастер Б.Мөнгөнтуул бид дөрөв дуу дуулна.

Мөн Үндэсний бөхийн тамирчид маань бас дуу дуулна. Бид бэлтгэлээ хийгээд л байж байна. 

-Ярилцсанд баярлалаа. 

Д.Батчулуун