Өнгөрсөн оны нэгдүгээр сард Л.Оюун-Эрдэнийн хамтарсан Засгийн газар гурван Ерөнхий, нэг дэд консулыг томилж байв. Тодруулбал, БНХАУ-ын засаг захиргааны онцгой бүс Хонгконгт суух Ерөнхий консулаар Д.Одбаярыг, БНСУ-ын Бусан хотод суух Ерөнхий консулаар Ц.Жадамбааг, БНХАУ-ын Эрээн хотод суух Ерөнхий консулаар З.Лхагвадоржийг, АНУ-ын Чикаго хотод суух дэд консулаар С.Эрдэнийг томилж байсан юм.

Ингэхдээ хамтарсан Засгийн газрын бүрэлдэхүүнд орж байсан намууд болох МАН Д.Одбаярыг, АН Ц.Жадамба, С.Эрдэнэ нарыг, ХҮН З.Лхагвадоржийг өөрсдийн квотоор томилж байлаа.

Нэг тогтоолоор томилогдож байсан консулуудаас Эрээн дэх Монгол Улсын Ерөнхий консул З.Лхагвадоржийн талаарх саар мэдээлэл сүүлийн үед газар аваад байна. Түүнийг “Нэг цэгийн үйлчилгээ” нэрийн доор авилга авдаг хэмээгээд эгүүлэн татахыг шаардсан гомдлууд төв рүү буюу Гадаад харилцааны яаманд ирэх болжээ. Хамтарсан Засгийн газрын үед ХҮН намын квотоор Ерөнхий консулаар томилогдож байсан З.Лхагвадорж нь тухайн үед Шадар сайд Т.Доржхандын Гадаад худалдаа, хөрөнгө оруулалт хариуцсан ахлах зөвлөх бөгөөд Ажлын албаны даргаар ажиллаж байсан юм.

А.Болд