Төсвийн тодотголын хамгийн халуун сэдэв болох Ерөнхий сайд Н.Учралын гэр бүлийн хамаарал бүхий сургуульд төсвөөс 3.5 тэрбум төгрөг олгох асуудал сөхөгдөж байхад сөрөг хүчний намын дарга БНХАУ-д айлчилж, түүний өмнөөс бүлгийн ажлын албаны дарга Б.Энхмөнх улс төрийн галыг үүрч үлдсэн дүр зураг тодорч байна.

Намрын чуулган эхэлж, төсвийн тодотголын заалт бүрийг эрх баригчид, сөрөг хүчнийхэн хуруу даран тоолж суугаа энэ үед 3.5 тэрбум төгрөг Ерөнхий сайд Н.Учралын сандал суудлыг ганхуулж мэдэх улс төрийн томоохон цохилт болов.

Төсөвт “Гэрт ойр сургууль” хөтөлбөрийн хүрээнд хувийн гурван сургуульд тоног төхөөрөмжийн санхүүжилтээр нийт 7 тэрбум төгрөг тусгаснаас “Их Засаг Кингс”-д 3 тэрбум 520 сая төгрөг ногдсон гэх асуудал ийнхүү олны анхаарлыг татаад байна.

Эл явдлын дараа АН-ынхан Ерөнхий сайдыг ашиг сонирхлын зөрчилтэй, өөрийн хамаарал бүхий этгээдэд давуу байдал бий болгосон байж болзошгүй хэмээн үзэж, АТГ-т шалгуулахаар холбогдох баримт, материалаа өгснөө зарлав. Мөн Боловсролын яамны ТНБД Т.Ням-Очирт дарамт үзүүлсэн байж болзошгүй гэх баримтыг ч хавсаргаснаа мэдэгдсэн. 

АН-ын дарга О.Цогтгэрэлийн айлчлал үргэлжлэх зуур түүний ойрын хүрээний хүн, “торгон цэрэг” гэгддэг Б.Энхмөнх энэ удаа даргынхаа өмнөөс дуугарч, эрх баригчдын эмзэг цэгийг онилсон нь нэг талаар сөрөг хүчний ажлаа тултал хийж байна. 

Гэвч алсуур ажиглавал төсвийн тодотгол дээр эрх баригчдыг шахаж, Ерөнхий сайдаас тайлбар нэхэх ийм сэдэв өдөр бүр олдохгүй. Ийм үед намын даргын байр суурь хамгийн тод сонсогдох учиртай атал, түүний өмнөөс ажлын албаны дарга нь дуугарсан нь АН-ын даргын манлайллын бас нэг дүр зургийг ил гаргав.

УИХ дахь АН-ын бүлгийн ажлын албаны дарга Б.Энхмөнх энэ удаа даргынхаа өмнөөс галыг авсан ч Ардчилсан Нам шиг дотроо олон фракц, тооцоотой намд нэгнийхээ өмнөөс хийсэн улс төр нөгөөгийнхөө байр суурийг сулруулах эрсдэлтэй. Өөрөөр хэлбэл, Ерөнхий сайд Н.Учралын эсрэг чиглэсэн 3.5 тэрбумын сум АН-ын даргын байр суурийг онохвы... 

Т.Золзаяа