Олон нийтийн сүлжээнд олны танил болсон ах дүү Эндрю, Тристан Тейт нарыг Их Британид шилжүүлэн өгөхтэй холбоотой шүүхийн ажиллагаа үргэлжилж байх хугацаанд АНУ-д цагдан хорих шийдвэр гаргажээ. Флорида мужийн Майами хотод болсон шүүх хурлаар холбооны шүүгч Лорен Луис тэднийг батлан даалтаар суллах өмгөөлөгчдийн хүсэлтийг хүлээн аваагүй байна. Ингэснээр ах дүү Тейт нар Их Британийн талд шилжүүлэн өгөх эсэх асуудал шийдэгдэх хүртэл холбооны хорих төвд саатуулагдах юм.

Прокуроруудын зүгээс тэднийг суллавал оргон зайлах эрсдэлтэй гэж үзжээ. Учир нь ах дүү Тейт нар олон улсын хэмжээнд зорчих боломжтой, санхүүгийн өндөр чадамжтай бөгөөд олон паспорт эзэмшдэг тухайгаа өмнө нь олон нийтийн сүлжээнд ярьж байсан байна. Харин тэдний өмгөөлөгчид ах дүү хоёрыг сулласнаар шүүхийн ажиллагаанаас зугтахгүй бөгөөд Румынд үргэлжилж буй хэрэгтэй холбоотойгоор өмгөөлөгчидтэйгээ илүү үр дүнтэй ажиллах шаардлагатай гэж тайлбарласан байна.

Эндрю, Тристан Тейт нар өнгөрсөн долдугаар сард Их Британийн хүсэлтийн дагуу АНУ-д баривчлагдсан. Их Британийн тал тэднийг хүчингийн хэрэг болон хүний наймаатай холбоотой эрүүгийн хэрэгт шалгуулахаар шилжүүлэн авах хүсэлт гаргасан юм.

Үүний зэрэгцээ Румынд ах дүү Тейт нартай холбоотой эрүүгийн хэрэг үргэлжилж байгаа бөгөөд прокурорууд тэдэнд хүн худалдаалах, мөнгө угаах болон бэлгийн гэмт хэрэгтэй холбоотой хэд хэдэн зүйл ангиар яллах дүгнэлт үйлдсэн байна. Ах дүү Тейт нар өөрсдийгөө буруугүй хэмээн мэдэгдэж, дээрх бүх хэргийг үгүйсгэсээр байгаа юм.

Их Британийн эрх баригчид есдүгээр сарын 16-ны дотор тэднийг шилжүүлэн авахтай холбоотой албан ёсны хүсэлт, шаардлагатай баримт бичгүүдийг АНУ-ын талд хүргүүлэхээр болжээ. Шилжүүлэн өгөх эсэхийг эцэслэн шийдвэрлэх шүүхийн тов одоогоор гараагүй байна.

Л.Баяр