АНУ-ын Чикаго хотоос гаралтай реппер Lil Durk буюу Дөрк Бэнкс 2022 онд өрсөлдөгч реппер Quando Rondo-г хөнөөхөөр захиалга өгсөн гэх холбооны эрүүгийн хэргийн бүх зүйл ангиар цагаадлаа. Лос-Анжелес хотын холбооны шүүхийн тангарагтны шүүх гурван өдөр хэлэлцсэний эцэст 33 настай репперийг хүн амины хэрэг захиалсан, хүн амины хэрэг үйлдэхээр хуйвалдсан болон хүний амь нас хохирсон мөрдлөгийн хэрэгт буруугүй гэж үзсэн байна.

Прокуроруудын зүгээс Lil Durk нь 2020 онд өөрийн дотнын найз, реппер King Von буюу Дэйвон Бэннеттийг Атланта хотын шөнийн клубт буудуулж амиа алдсаны хариуг авахын тулд Quando Rondo-г онилсон гэж буруутгаж байжээ. Хэрэг явдал 2022 оны наймдугаар сард Лос-Анжелес хотын Beverly Center худалдааны төвийн ойролцоох шатахуун түгээх станцын дэргэд болсон байна. Прокуроруудын мэдээлснээр, зэвсэглэсэн этгээдүүд Quando Rondo-гийн автомашин руу гал нээсэн боловч түүнийг хөнөөж чадаагүй. Харин түүний 24 настай үеэл Сэвиа’Робинсон буудуулж амиа алдсан байна.

Мөрдөн шалгах ажиллагааны үеэр прокурорууд Lil Durk-ийг халдлагыг санхүүжүүлж, зохион байгуулсан гэж үзсэн бөгөөд түүнтэй холбоотой хөгжмийн хамтлаг, лейбл болох Only the Family-ийн хүрээнд ажилладаг хүмүүс уг халдлагад оролцсон гэж мэдэгдэж байв.

Харин репперийн өмгөөлөгчид түүнийг халдлагын талаар мэдээгүй бөгөөд хэргийг түүний өмнөх туслах өөрийн санаачилгаар зохион байгуулсан гэж тайлбарласан байна. Мөн прокурорын гол гэрчүүд өөрсдийн ялыг хөнгөрүүлэхийн тулд Lil Durk-ийн эсрэг мэдүүлсэн гэж өмгөөлөгчид маргажээ. Lil Durk 2024 оны аравдугаар сард Флорида мужид баривчлагдсан бөгөөд түүнээс хойш холбооны цагдан хорих байранд байсан юм.

Тэрээр энэ удаагийн хэргийн бүх зүйл ангиар цагаадсан ч шүүхийн танхимаас шууд суллагдахгүй. Учир нь түүнд холбогдох өөр нэг рекет буюу зохион байгуулалттай гэмт хэргийн шинжтэй хэрэг тусдаа шүүхээр хэлэлцэгдэхээр үлджээ. Уг хэргийн шүүх хурал аравдугаар сарын 5-нд эхлэхээр товлогдсон бөгөөд хүн амины хэрэг болон галт зэвсэгтэй холбоотой зүйл анги багтсан байна. Lil Durk нь 2024 онд “All My Life” дуугаараа “Шилдэг мелодик рэп үзүүлбэр” төрөлд “Грэмми” хүртсэн бөгөөд сүүлийн жилүүдэд Америкийн хип-хоп урсгалын нэр хүндтэй уран бүтээлчдийн нэг болжээ.

Л.Баяр