“Looney Tunes” хүүхэлдэйн киноны Багс Банни, Даффи Дак зэрэг алдартай дүрүүдэд дуу оруулснаараа олонп танигдсан, Эммигийн шагналт жүжигчин Эрик Бауса 46 насандаа таалал төгсжээ.

Түүний гэр бүлийнхэн 2026 оны аравдугаар сарын 25-нд жүжигчний албан ёсны Instagram хуудсаар дамжуулан гэнэтийн байдлаар нас барсан тухай мэдэгдсэн байна. Тэд одоогоор дэлгэрэнгүй мэдээлэл өгөөгүй ч Лос-Анжелес тойргийн шүүх эмнэлгийн мэдээллээр түүний нас баралтын шалтгааныг цусны даралт ихсэлттэй холбоотой зүрх судасны өвчин гэж тогтоожээ.

Эрик Бауса 1979 оны арванхоёрдугаар сарын 7-нд Канадын Онтарио мужийн Скарборо хотод төрсөн бөгөөд Филиппин гаралтай байв. Тэрээр багаасаа “Looney Tunes”-ийн дүрүүдэд дуртай байсан бөгөөд хүүхэд байхдаа тэдний дуу хоолойг дуурайдаг байжээ. Хожим нь энэ сонирхлоо мэргэжил болгон хөгжүүлж, хүүхэлдэйн киноны салбарын нэр хүндтэй дуу оруулагчдын нэг болсон юм.

Тэрээр Багс Банни, Даффи Дак нараас гадна Порки Пиг, Твити, Элмер Фадд, Фогхорн Легхорн, Замчин шувуу зэрэг олон дүрд дуу оруулсан байна. Мөн “Space Jam: A New Legacy”, “Coyote vs. Acme” зэрэг бүтээлд ажиллажээ. Үүнээс гадна “The Adventures of Puss in Boots” цувралын Гуталт муур, “Muppet Babies” хүүхэлдэйн киноны Бяцхан Фоззи баавгай болон “Star Wars”-ын зарим хүүхэлдэйн бүтээлд Люк Скайуокерын дүрд дуу оруулж байв.

Бауса уран бүтээлийнхээ хугацаанд 400 гаруй жүжигчний кредиттэй болж, 2022, 2023, 2025 онд Хүүхэд, гэр бүлийн Эммигийн гурван шагнал хүртсэн юм. Тэрээр “Looney Tunes” хүүхэлдэйн киноны домогт дуу оруулагч Мел Бланкийн бүтээсэн дүрүүдийг үргэлжлүүлэн амилуулсан уран бүтээлчдийн нэг байлаа. Warner Bros. компанийн удирдлагууд түүнийг олон сая хүнд баяр баясгалан, инээд хөөр бэлэглэсэн авьяаслаг уран бүтээлч хэмээн дурсжээ.

Л.Баяр