Монгол Улсын Засгийн газраас ирэх онд "Шүд" төслийг эхлүүлэх гэж буй. Үүнтэй холбогдуулан 24tsag.mn мэдээллийн сайт болон Ашид дент шүдний эмнэлгийн зүгээс "Эмч зөвлөж байна" булангаараа дамжуулан шүд арчилгаатай холбоотой зөвлөгөө мэдээллийг хүргэх юм. Бид энэ дугаартаа шүд цайруулах эмчилгээний талаар Ашид дент шүдний эмнэлгийн нүүр амны их эмч Б.Даваанямаас тодрууллаа. 

Тэрбээр, "Цайруулах эмчилгээг хийх хэд хэдэн заалт бий. Хүний шүдэнд физиологийн шарлалт явагддаг. Нас ахих тусам хоол хүнсний хэрэглээнээс үүдэн шүд шарладаг гэсэн үг. Мөн тамхи татах, кофе зэрэг өнгөтэй зүйлийн хэрэглээнээс болж эрс шарлах тохиолдол байдаг. Ундны усны фторын илүүдлээс болсон хөнгөн хэлбэрийн шарлалтад цайруулах эмчилгээ хийнэ гэх зэрэг заалттай.

Цайруулах эмчилгээг өсвөр насны хүүхдэд хийж болохгүй. 16-аас доош насны хүүхдүүдийн шүдний паалан бүрэн эрдэсжээгүй байгаа учраас хориглодог. Мөн жирэмсэн эмэгтэйчүүдэд хийдэггүй. Ялангуяа өндөр проценттай цайруулалтыг хийхгүй.

Манай улсад америк цайруулалтыг түгээмэл хэрэглэдэг. Энэ нь 40 процентын өндөр тунтай. Маш сайн үр дүнтэй, 2-3 тонн цайруулдаг. Таны нүдэн дээр гоё үр дүнг авч ирдэг. Гэвч гоо сайханд золиос хэрэгтэй гэдэгчлэн бага зэрэг өвдөнө. Тиймээс л жирэмсэн болон хэт мэдрэгшилтэй хүмүүст хориглодог юм.

Японы өвдөлтгүй цайруулалтууд бий. Процент бага, хэрэглэх арга техникээрээ ялгаатай боловч үр дүн нь адил төстэй. Улс орон болгон шүдний эмнэлэгт хэрэглэж байгаа цайруулах бүтээгдэхүүний стандартыг тогтоосон байдаг. Жишээ нь Англи улсад 6 процентын устөрөгчийн хэт ислийг цайруулах эмчилгээнд хэрэглэнэ гэсэн дээд түвшин байдаг. Харин манай улсад бол ямар нэгэн стандарчлагдсан зүйл үгүй. Тиймээс бид олон улсад хэрэглэгдэж байгаа бүтээгдэхүүнийг Америк, Япон, Англи, Солонгосоос түгээмэл авч хэрэглэдэг. Олон улсын хэрэглээд заншсан бүтээгдэхүүнийг оруулж ирж хэрэглэдэг учраас зарим нь өвтгөнө, зарим нь өвтгөхгүй.

Хүмүүс цайруулалтын дараа шүд үйрдэг үү эсвэл хэт мэдрэгшил үүсдэг үү гэж асуудаг. Цайруулах бүтээгдэхүүний гол үйлчилгээ бол шүдний паалангийн дотор байдаг тугалмай эд нь шүдний өнгийг тодорхойлж байдаг. Тэрхүү тугалмай эд рүү нэвтэрч цэвэрлэх процесс өрнөдөг гэсэн үг. Тийм учраас шүдэнд ямар нэгэн сөрөг нөлөө буюу шүдийг хэврэгшүүлэх, сийрэгжүүлэх эрсдэл байдаггүй.

Аль ч бүтээгдэхүүнийг хэрэглэсэн тухайн эмнэлэгт түүнд тохирсон эрдэсжүүлэх эмчилгээ, бүтээгдэхүүн байдаг. Мөн эмчийн зөвлөгөөг сайн дагаж чадвал эрсдэлгүй. Одоогоор манай улсад ч дээрх тохиолдол бүртгэгдээгүй байгаа учраас харьцангуй чанартай бүтээгдэхүүнийг хэрэглэдэг гэдгийг итгэлтэй хэлж чадна.

Миний хувьд арав гаруй жил америк цайруулалтыг гэрийн болон оффис, эмнэлгийн нөхцөлд хэрэглэж байгаа. Тухайн үедээ өвдөх, зовиуртай байдаг ч эрсдэлгүй.

Шүд цайруулах эмчилгээнд орохын тулд цооролгүй, эрүүл шүдтэй байх ёстой. Ямар нэгэн цоорол болон асуудалтай байвал эмч ч мөн шууд хийхийг зөвлөхгүй.

Харин цахимаар цайруулах бүтээгдэхүүн авч шууд хэрэглэвэл танд ямар нэгэн эрсдэлтэй байх вий гэж санаа зовж байна. Гэр эсвэл эмнэлгийн нөхцөлд хэрэглэх ч бай заавал зөвлөгөө авч, өөрт тохирсон бүтээгдэхүүнээ хэрэглээрэй.

Монголд бразил цайруулалтыг ч мөн хэрэглэдэг. Эмнэлгийн нөхцөлд илүү хурдан үр дүнг үзүүлэх бүтээгдэхүүнийг хэрэглэдэг учраас эмч өөрийн хяналт дор хийдэг. Харин гэрийн нөхцөлд бол 7-14 хоног хэрэглэх, зориулалтын халбагатай гэх мэт бүтээгдэхүүнүүд бий.

Та хурдан хугацаанд үр дүнд хүрэхийг хүсвэл шүдний эмнэлгийн цайруулах үйлчилгээг сонгох хэрэгтэй. Өөрийн тань шүд мэдрэг, өвдөлт мэдрэх босго нам бол гэрийн цайруулалтыг танд зөвлөнө. Хүн болгон цагаан шүдтэй, гялалзсан сайхан байхыг хүсдэг шүү дээ.

Харин зөв бүтээгдэхүүнийг мэргэжлийн эмчийн хяналт дор хэрэглэвэл ямар нэгэн эрсдэл болоод айдас байхгүй гэдгийг зөвлөе" гэлээ.

М.Дэвээжаргал