Энэ жилийн Үндэсний их баяр наадмаар Улсын начин цол хүртсэн бөхчүүдийг цувралаар хүргэж байна. Энэ удаа Увс аймгийн Ховд сумын уугуул Улсын начин Лхагвасүрэнгийн Энхсаруулыг онцолж байна.

Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой Үндэсний их баяр наадмын хүчит бөхийн барилдаанд Увс аймгийн Ховд сумын уугуул Лхагвасүрэнгийн Энхсаруул тав давж, Улсын начин цол хүртсэн билээ. Тэрбээр 1993 оны аравдугаар сарын 28-ны өдөр Увс аймгийн Ховд суманд төрж, өсжээ. Түүнийг анх бөхийн замд эрчимтэй хөтөлж оруулсан гол хүн гэвэл чөлөөт бөхийн Ази тивийн аварга Н.Баярмагнай. Л.Энхсаруул арслан үеийн хөвгүүдийн адил, PC тоглоомонд дуртай, хонон өнжин тоглох өдөр олон байж. Харин түүний бөхийн авьяасыг олж харсан багш нь Л.Энхсаруулыг бөх рүү эргэлт буцалтгүй оруулсан гэдэг. 

Тэрбээр 2011 онд сумын заан цол хүртэж байв. Дараа нь 2015 онд аймгийн начин, 2022 онд аймгийн арслан цол хүртэж байв. Ийнхүү энэ жилийн Үндэсний их баяр наадмаар зодоглож, Улсын начин цол хүртсэн юм. 

Лхагвасүрэнгийн Энхсаруул нь "Увс Нуур" дэвжээ, Алдар" спорт хороо, ЗХ-189 анги, Алсын Жим ХХК, Алтаргана Констракшн ХХК-д харъяалагддааг аж. 

Тэрбээр энэ жилийн Үндэсний их баяр наадмаар дараах бөхчүүдийн давж Улсын начин цол хүртжээ. Тавын даваанд Аймгийн арслан Ц.Төмөрцоожийг давж, Улсын начин цол хүртсэн. 

• Нэгийн даваанд Аймгийн начин М.Батбаатар /Өвөрхангай аймаг/
• Хоёрын даваанд Улсын начин Х.Цогтгэрэл /Булган аймаг/
• Гурвын даваанд Аймгийн арслан У.Батцоож /Ховд аймаг/
• Дөрвийн даваанд Улсын заан Б.Серик /Баян-Өлгий аймаг/
• Тавын даваанд Аймгийн арслан Ц.Төмөрцоож /Ховд аймаг/