“Хувьсал” продакшн уран бүтээл бүрдээ хувьсаж, Монголын кино урлагт хувьслыг авчирсаар байна. Үүний нэгэн жишээ бол гуравхан хоногийн өмнө нээлтээ хийсэн "Хувь заяа" уран сайхны кино юм. 

"Хувь заяа" кино 2022 онд Өмнөговь аймгийн Хүрмэн сумын Жанжин багийн нутаг дэвсгэрт зураг авалтаа хийсэн бөгөөд "Эмэгтэй хүн бүрийн дотор эх хүний сэтгэл оршиж байдаг" гэдгийг харуулахыг зорьсон аж.

Мөн Монгол орныхоо үзэсгэлэнт байгалийг үзэгчдэдээ харуулж, өв соёлоо дээдлэх, байгаль эх дэлхийгээ хайрлах хамгаалах сэтгэхүйг киногоороо дамжуулан үзүүлэхийг зорьжээ. 

Киноны зохиолыг зохиолч Г.Бямбасүрэн бичиж, мөн тус киноны найруулагчаар ажилласан юм. Харин гол дүрд Ардын жүжигчин, Хөдөлмөрийн баатар Д.Мэндбаяр, Гавьяат жүжигчин П.Эрдэнзаан, У.Уранчимэг, залуу жүжигчин У.Нартай, туслах дүрд Соёлын тэргүүний ажилтан Д.Пүрэвсүрэн, Н.Бадарч, Б.Баярмаа нар тус тус дүр бүтээжээ. Ийнхүү уншигч та бүхэнд "Хувь заяа" киноны тухай зохиолч, найруулагч, жүжигчдийн сэтгэгдлийг хүргэж байна.