Ерөнхий сайд Н.Алтанхуяг өнөөдөр сэтгүүлчидтэй уулзалт хийлээ. Уулзалтын үеэр тэрээр сэтгүүлчдийн асуултад дэлгэрэнгүй хариулт өгсөн юм.

-Таныг ТЕГ-ын дэд даргаар Б.Ариунсанг томилсон асуудлаар Үндсэн хуулийн Цэцэд маргаан үүсгэсэн. Ер нь төрийн албаны халаа сэлгээний асуудал хэзээ цэгцрэх вэ?

-Би хоёр ч удаа Цэцэд шалгуулсан. Өнөөдрийн хувьд бүх аймгийн Засаг дарга томилогдчихсон. Гэхдээ өмнө нь би Хөвсгөл, Дорнод аймгийн Засаг даргын үүрэг гүйцэтгэгчийг томилсон. Учир нь Хөвсгөлийн Засаг даргад нэр дэвшигч нь АТГ-т шалгагдаж байсан. Би Үндсэн хуулиа зөрчиж ажиллах хүн биш. 2004 онд дөрвөн аймгийн Засаг даргын үүрэг гүйцэтгэгчийг томилж байсан. Азтай нь тэр үед МАН, АН хоёр хамтарч Засгийн газар байгуулсан байсан. Тэгэхээр Н.Алтанхуяг хийхээр Үндсэн хууль зөрчсөн болчихоод байгаа юм.

-Б.Ариунсангийн томилгооны тухайд?

-Б.Ариунсанг ТЕГ-ын даргаар томилсон гэхээсээ илүүтэй өмнө нь дэд дарга байсан Ч.Чулуунбаатарыг ажлаас нь халсантай холбоотой гомдол яваад байгаа. Засгийн газраас нууцын тухай хуульд өөрчлөлт оруулах гэж байна. Иргэн хүн хурууныхаа хээгээр мэдээллээ авчихдаг төхөөрөмжийг бид суулгах гэж байгаа. Энэ мэдээллийг нууцаас гаргах бас газрын зургийн зарим нарийвчлалыг нууцаас гаргах цаг болсон гэж үзсэн. Гэтэл ТЕГ-ын дэд дарга УИХ-д очоод үүнийг эсэргүүцсэн мэдэгдэл хийсэн. Засгийн газрын хийхээр зүтгэж байгаа ажлыг агентлагийнх нь дэд дарга очоод эсэргүүцээд байж болохгүй. Үүнээс л үүдэлтэй гомдол юм. Түүнээс биш Б.Ариунсан гэдэг хүнтэй Н.Алтанхуяг түрийвч нэгтэй гэдэг яриа худал.

-Эрүүл мэндийн салбар дөрвөн сарын хугацаанд удирдлагагүй байлаа. Энэ асуудалд яаж хандаж байна вэ?

-Эрүүл мэндийн сайд Н.Удвал эмнэлгийн даргыг чөлөөлсөн. Саяхнаас хоёр эмнэлгийн даргыг томилсон. Төрийн нарийн бичгийн дарга нар үүрэг гүйцэтгэгч нар байсан. Тэднийг жинхэлж байж үүрэг гүйцэтгэгчийг томилно. Эрүүл мэндийн салбарт гурван ажлын хэсэг гарч ажиллаж байна. Ирэх долоо хоногт эхний үр дүнг харна.

-Оюутолгой компанийн ажилчдын цалингийн зөрүү их байна. Үүнийг яаж зохицуулах вэ?

- Үүнийг Хөдөлмөрийн яам зохицуулахаар ажиллаж байна.

-Оюутолгойн компанийн хувь нийлүүлэгчдийн хуралдааны явц ямар байна вэ?

-Шинэчлэлийн Засгийн газар Оюутолгойтой хамтарч суугаад асуудлаа ярьж байна.

-Бондын хөрөнгийг үр ашиггүй үрж байна гэсэн шүүмжлэл байгаа?

-Үүнийг УИХ-ын гишүүн Д.Хаянхярваа ярьсан байсан. Би Засгийн газрын 1111 төвд ирсэн иргэдийн ирсэн гомдолтой танилцдаг.  Д.Хаянхярваа гишүүнийг худлаа мэдээлэл өгөөд байгаад хариуцлага тооц гэсэн байна лээ. Би Д.Хаянхярваад хариуцлага тооцдог хүн биш. Өнөөдөр бондын мөнгөнөөс нэг ч төгрөг гараагүй. Алдагдал хүлээгээгүй. Монголбанк менежмент хийж байгаа.

-Бондын хөрөнгөөр дахин хэдэн төсөл санхүүжүүлэх вэ?

-Бид дөрвөн зүйлд санхүүжилт өгөхөөр тогтсон. Үүнд, “Гудамж” төслийн хүрээнд  33 замын уулзварыг өөрчлөнө. Зургаан аймгийн төвийг хатуу хучилттай замаар холбоно. Шинэ төмөр замын төсөл. Нэг ширхэг цахилгаан станцид бондны мөнгөнөөс өгөхөөр болсон. 50 сая долларыг тавантолгойд босгох гэж байгаа цахилгаан станцид өгөхөөр болсон. Оюутолгойд хятадаас цахилгаан авч байгаа учраас Тавантолгойд цахилгаан барих шаардлага байна. Энэ бямба гаригт хуралдах Засгийн газрын хуралдаанд дахин таван төслийн асуудлыг шийднэ. Ноос, ноолуур, сүү, оёдлын салбарыг дэмжинэ гэж ярьж байгаа. Мөн арьс ширний асуудал байна. Гэхдээ арьс ширэнд Чингис бондоос мөнгө гаргахгүй.  Ийм есөн чиглэлд мөнгө гаргахад бэлэн.