Ерөнхий сайд Н.Алтанхуяг өнөөдөр сэтгүүлчидтэй уулзалт хийлээ. Уулзалтын үеэр тэрээр сэтгүүлчдийн асуултад дэлгэрэнгүй хариулт өгсөн юм.
    Ерөнхий сайд Н.Алтанхуяг өнөөдөр сэтгүүлчидтэй уулзалт хийлээ. Уулзалтын үеэр тэрээр сэтгүүлчдийн асуултад дэлгэрэнгүй хариулт өгсөн юм.

/Үргэлжлэл/

-Хорих ангид шатсан Бааварын хэрэгт та тайлбар өгөөч?

-Хаана, хаанаа ил тод байх хэрэгтэй. Тиймээс би ШШГЕГ-ынханд камерийн бичлэгийг нийтэд ил болго гэж хэлсэн. Гэтэл бичлэгийг алга болгосон гэсэн. Бичлэгийг л харуулах ёстой. Хэрвээ харуулж чадахгүй бол ажлаас нь халаад явна. Би ямар манаач юм уу. Бүгдэнтэй нь тулж ажиллах боломжгүй байна. Та бүхэн энэ бүхнийг ил тод хэлэх хэрэгтэй.

-Зургаан хувийн хүүтэй зээлийг байхгүй болгоно гэж байгаа?

-Орон сууцны зургаан хувийн хүүтэй зээлийн бодлого буруу байсан. Баригдсан байшин цөөн байхад зээл зарласан. Төсөвт алдагдал үүрүүлсэн. Мөн иргэдэд ашигтай зүйл болоогүй. Байшингийн нэг метр квт-ын үнэ хоёр дахин өссөн. Засгийн газар энэ бодлогыг өөрчлөх нь зүйтэй гэж ажиллаж байна. Ойрын хугацаанд  шинэ бодлогоо зарлана. Магадгүй 8-9 хувийн хүүтэй, урт хугацааны зээл байх юм. Төр барьж дуусаагүй барилгад иргэдийг зээл авахуулж байна. Хэзээ босох нь мэдэгдэхгүй байшинд зээл авч байна. Үүнээс хойш барьж дууссан байшинд зээл олгодог байх бодлогыг томъёолж байна. Энэ бямба гаригт Засгийн газрын хурлаар  энэ асуудлыг оруулна.

-100 мянган айлын хохирогчдын асуудлыг яаж шийдэх вэ?

-Өчигдөр бид ярьсан. ОССК, Төрийн банкнаас ажлын хэсэг гаргаж, баригдсан байшинг тоолуулж байна. Хэдэн иргэн баригдсан орон сууцанд өргөдөл өгсөн, хэд нь баригдаагүй байшинд өргөдөл өгснийг судлуулж байна. Мөн хохирогчийн төлөөлөлтэй ажлын хэсэг байгуулна.

-Орон сууцны нэг метр квт-ын үнийг 1.2 саяд багтаах бодолтой байгаагаа хэлж байсан. Энэ хүрээнд ямар ажил хийж байна вэ?

-Хувийн компаниуд барьсан байраа зарахад төр оролцохгүй. Харин төр дэд бүтцээ шийдэж өгч байгаа тохиолдолд гэрээ хийнэ.

-Тавантолгойн асуудал ямар байна вэ. Чалкотой байгуулсан гэрээгээ цуцална гэж байсан. Энэ асуудал шийдэгдсэн үү?

-Тавантолгойн нүүрсээ гаргаж чадахгүй зогссон. Одоогийн байдлаар сая гаруй тонн нүүрс буюу 30 гаруй сая долларын нүүрс хураалттай байна. Яагаад нүүрсээ гаргахгүй байна гэхээр өмнөх гэрээний дагуу нүүрс гаргавал алдагдалд орж байгаа. Нэг кг нүүрснээс зургаан долларын алдагдалд орно. Тиймээс Чалкотой Тавантолгой компани гэрээ хийе, алдагдалтай үнээр нийлүүлэх боломжгүй гэдгийг ярилцаж байна. Нэмээд ашигтай болгох хэлэлцээрийг хийж байна. Бид сонгуулийн өмнө 350 сая долларыг Чалкогоос авсан. Гаргасан нүүрснээсээ 170 орчим сая долларыг төлсөн. Дахин 180 сая долларын өртэй байна. Үүнийг нүүрсээр төлөхөд алдагдалд ороод байна.

-Монгол Улсын эдийн засгийн нөхцөл хүндхэн байна гэж яриад байна?

-Эдийн засагт хүндрэл тохиолдож байна. Гадаадын хөрөнгө оруулалтын хэмжээ багасч байгаа. Энэ бол бодит зүйл. Өнгөрсөн оны мөн үеэс гадаадын хөрөнгө оруулалтын хэмжээ багасах байдалтай болсон. Оюутолгойн хөрөнгө оруулалт нэмэгдэхгүй байгаа. Мөн стратегийн салбарт гадаадын хөрөнгө оруулалт хумигдаж байна. Засгийн газраас дүн шинжилгээ хийсний эцэст УИХ-аас стратегийн салбарт хөрөнгө оруулж байгаа хуульд өөрчлөлт оруулахаар өргөн барьсан. Гадаадын төрийн өмчийн компанийн хөрөнгө оруулалтыг хязгаарлаж, хувийн компанийн хөрөнгө оруулалтыг хязгаарласан зүйлийг болиулах нь зүйтэй гэж үзээд хуулийн төсөл өргөн барьж байна. Мөн 100 тэрбум төгрөгөөс дээш хөрөнгө оруулбал заавал УИХ-д шалгуулдаг байдлыг болиулж, мөнгөний хэмжээг өөрчилнө. Ийм өөрчлөлт оруулснаар тодорхой хэмжээний хөрөнгө оруулалт нэмэгдэнэ. Гадаадынхан Монголын хууль эрх зүйн орчин урьдчилан харах боломжгүй, гэнэтхэн өөрчлөгдөж байна. Үүнийг тогтворжуулах, ойлгомжтой байх тал дээр анхаарахыг хүсдэг. Хөрөнгө оруулалтын тухай хуулийн төсөл дээр ажиллаж байна.