Өнөөдөр АНУ-ын Элчин сайдын яамны Улс төрийн хэлтсийн дарга Брайн Күүнц МАХН-ын Ерөнхий нарийн бичгийн дарга Ш.Шийлэгдамбатай уулзлаа.
    Өнөөдөр АНУ-ын Элчин сайдын яамны Улс төрийн хэлтсийн дарга Брайн Күүнц МАХН-ын Ерөнхий нарийн бичгийн дарга Ш.Шийлэгдамбатай уулзлаа. Тэрбээр урьд нь МАХН болон Ерөнхий нарийн бичгийн дарга асан Н.Удвалтай холбоотой байсан бөгөөд энэ удаад ч мөн ажил хэргийн шугамаар уулзалт хийсэн юм байна.

    Брайн Күүнц МАХН-ынхан ирэх Ерөнхийлөгчийн сонгуульд хэрхэн оролцох болсон талаар асуугаад “Сонгуулийн хуулинд өөрчлөлт оруулах саналтай байгаа гэсэн. Тухайлбал, санал тоолохдоо автоматаар болон гараар хэрхэн тоолох, хэвлэл мэдээллийн хэрэгслүүд болон төрийн байгууллагуудын хараат байдлыг хэрхэн шийдвэрлэж болох вэ” хэмээн асуусан юм.

    Үүнд Г.Шийлэгдамба “Манай нам Ерөнхийлөгчийн сонгуульд хэрхэн оролцох талаараа Бага чуулганыхаа хурлаар хэлэлцсэн. Манай намаас бусад намын нэр дэвшигчидтэй өрсөлдөх гол хүн маань шоронд хилс хэргээр хоригдож байна. Тэгэхээр бид өөрсдийн нөөц бололцоогоо ашиглаж хүмүүсээ гаргасан. Ер нь манай намын зүгээс сонгуулийн тухай хуулинд өөрчлөлт оруулах шаардлагатай гэж үзэж байгаа. Учир нь олонхи болсон нам хуулийг өөрсөддөө тохируулсан өөрчилж байна. тэгэхээр тэр боломжийг үгүй хийхгүй бол цаашид энэ үргэлжилсээр байх болно. Хэрэв шударга үнэнд хуулийг нийцүүлэн өөрчилж чадвал, мөн бусад намуудтай хамтран нэг зорилгоор ажиллаж чадвал сонгуультай холбоотой будлиан болон хараат шүүх, хэвлэл мэдээллийн хэрэгсэл зэрэг нь хамтдаа шийдэгдэх боломжтой болох юм. манай шүүхийн байгууллага үнэхээр хараат байгаа нь өнгөрсөн Н.Энхбаяр даргатай холбоотой шүүх хурлын явцад харагдлаа. Сая гэхэд Дээд шүүхийн бүх шүүгчдийн хуралдаанаар хэлэлцүүлэх гэсэн боловч Ц.Зоригт шүүгч шалтгаангүйгээр татгалзсан” гэсэн юм.

    АНУ-ын Элчин сайдын яамны Улс төрийн хэлтсийн дарга Брайн Күүнц болон МАХН-ын ЕНБД Г.Шийлэгдамба нарын ярианы бас нэгэн гол сэдэв бол Н.Энхбаяр байлаа. Энэ талаар Брайн Күүнц “Ваншингтоноос Н.Энхбаярын талаарх мэдээллийг байнга асууж байдаг. Тэгэхээр яг одоогоор түүний биеийн байдал ямар байгаа болон Улсын Дээд шүүхийн бүх шүүгчдийн хуралдаанаар түүний хэргийг авч хэлэлцэх шаардлагагүй гэж үзсэний талаар мэдээлэл өгөхгүй юу” хэмээн асуусан юм. МАХН-ын дарга Н.Энхбаярын биеийн байдал муудсаар байгаа бөгөөд үндсэн 3 оноштой байгаа талаар Г.Шийлэгдамба ярьсан юм. Мөн тэрбээр “Эсийн задрал аль хэдийнэ явагдаад эхэлсэн бөгөөд дотоод эрхтнүүдийн тутмагшил гэсэн оноштой байгаа. Эдгээр гурван онош нь монголд эмчлэх боломжгүй бөгөөд хэрэв өвчний улмаас ялаас чөлөөлөх журмын дагуу явсан бол Н.Энхбаярыг гадаадад эмчлүүлэх боломжтой байлаа. Уг нь журманд Энхбаяр даргын онош орсон байгаа. Харамсалтай нь энэ журмыг хэрэгжүүлэхгүй байна” гэв.