Шинэчлэлийн гэсэн сүржин нэртэй Засгийн газрын тэргүүний хэлсэн үг, хийсэн ажил үр дүнгээ өгөхгүй байгааг олон хүн ярьж эхэллээ.
    Шинэчлэлийн гэсэн сүржин нэртэй Засгийн газрын тэргүүний хэлсэн үг, хийсэн ажил үр дүнгээ өгөхгүй байгааг олон хүн ярьж эхэллээ. Арга барагдсан зарим нь ерөнхий сайд хийчих “арай өөр хүн олдоогүй юм байх даа” гэхэд нөгөө хэсэг нь Х.Баттулга хэмээн нэрлэх боллоо. Ингэх нь ч аргагүй эдийн засаг хүндрээд цөөнгүй аж ахуйн нэгж үүд хаалгаа барихаар бэлтгэж байна. Зах зээлд эргэлдэх мөнгөний хэмжээ илт багасч байна. Удахгүй аж ахуйн нэгжүүд үүд хаалгаа бариад эхлэхээр юм юм л болох байх даа.

    АН-ын тэргүүний хамгийн том улс төрийн хүчнээ “гол” гаргасны горыг өөрсдийнх нь хэлдэгээр “олуулаа” амсах шинжтэй болоод ирлээ. Тэгээд ч зогсохгүй гол өрсөлдөгчдөө нэг мөсөн нам дарж авахын тулд эхлүүлсэн авлигын эсрэг аян сүүлийн үед алдрах шинжиндээ орсон гэж эх сурвалж мэдээллээ. Нөгөө дуулиант олон хэргүүд чимээгүй болоод эхэлж байгаа нь цаанаа нэгийг өгүүлэх биз. Эрх баригчид МАН-ынхныг хомроглон шалгахын зэрэгцээ авлигачдын нам хэмээн цоллох болсон. Одоо энэ цол хэргэм өөрсдөд нь хамаатай болж магадгүйг Засгийн газрын тэргүүн ярьж байна.

    Учир нь саяхан БНСУ-аас монголд хямдхан бензин нийлүүлье гэхэд зарим этгээдүүд уулзаад урьдчилаад ихээхэн хэмжээний хахууль авчихжээ. Зүгээр ч нэг хахууль аваагүй хувь аваад бас болоогүй ашигийн урьдчилгаа гэж өгөхийг шаардаад хармайлжээ. Үүнийг ерөнхий сайд олж мэдээд өөрийн харьяанд байдаг Тагнуулын ерөнхий газарт өгчээ.

    Хэн ингэж орж ирээгүй ашигаас урьдчилж хахууль аваад байгааг шалгахаар одоо хүчний байгууллагууд ажиллаж эхэлжээ. Эх сурвалжийн тайлбарлаж байгаагаар бол бүдүүн зүрхтэй авлигачид бол АН-аас угшилтай байж болох гэнэ. Мэдээж эрх баригчид л асуудлыг шийдвэрлэж, зөвшөөрөл болоод бусад бүх асуудлыг “оk” болгоно хэмээн амлаж мөнгө нэхэж чадна.

     Муу нэртэй МАН-ийнханд одоо тийм боломж байхгүй болсон. Тэгэхээр тэд боломжгүй юмныхаа төлөө бусдаас мөнгө нэхэхгүй нь тодорхой байх.
Хэрэв энэхүү мэдээлэл үнэн бол цэвэр шударга имижтэй эрх баригчид, тэдний гар хөл ч гэсэн авлигалд нилээд гүн гүнзгий гар хөлөө дүрээд авсан бололтой.

    Одоогоор тэдгээр авлигачдыг ерөнхий сайд, тагнуулынхан л мэдэж байгаа аж. Тагнуулынхан энэ асуудлыг судалж нягтлаад харьяаллын дагуу АТГ-т хүргэх нь тодорхой. Харин тэдгээр эрхмүүдийн нэрс МАН-ынхан шиг ил тод болох болов уу? Хэрэв эрх баригчдын оролцоотойгоор хийгдсэн бол дараагийн шударга засаг хүртэл илрэхгүй тэгсхийгээд өнгөрнө гэж эх сурвалж тайлбарлав.

    Үнэхээр гадныхныг хуурч, дарамталж авлигал ил цагаан авсныг нь ерөнхий сайд маань мэдсэн бол элдэв хар дагуулж байхаар нэрлэчихэд бас л гэмгүй юм байгаам даа. Тэгвэл ядаж түүний унаж буй нэр хүнд “шударга” гэсэн үзүүлэлтээр өндийж ч мэднэ шүү дээ.

    Юутай ч гэсэн энэ Засгийн үед манай улсын этгээдүүд БНСУ-ын бизнес эрхлэгчдээс ихээхэн хэмжээний мөнгө, хувь хүртчихээд инээгээд явж байна. Ерөнхий сайд нь мэдчихээд байхад өнөөх шударга авлигалтай тэмцэгчид тун хурдан олж илэрүүлээд зарлаж чадахгүй байна гэдэг бас нэгийг өгүүлнэ.