Улсын эдийн засаг доройтож, гадаадын хөрөнгө оруулалт буурч байгаа нь Засгийн газрын буруу бодлого, тогтворгүй байдлаас бий болж байна хэмээн УИХ дахь МАН-ын бүлэг үзэж эсэргүүцлийн жагсаал хийсэн. Тэгвэл АН-ын бүлэг өчигдрийн хуралдаанаараа МАН-д хариу цохилт өгсөн тайлбар хийлээ. УИХ-ын АН-ын бүлгийн ахлагч Д.Эрдэнэбатын ярьж буйгаар 2011-2012 оны Засгийн газар буюу С.Батболдын Засгийн газар ихээхэн хэмжээний өр тавьсны улмаас эдийн засгийн өсөлт буурч  өнгөрсөн хавар баталсан Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид оруулах гадаадын хөрөнгө оруулалт эрс буурчээ.

     Тухайлбал С.Батболдын Засгийн газар өмнөх хоёр жилд Тавантолой Чалкогийн хооронд байгуулсан  гэрээгээр 350 сая ам.долларын урьдчилгааг таван хувийн хүүтэй, таван жилийн хугацаатай авсан. Дээр нь Хөгжлийн банк 600 сая ам.долларыг 5.27 хувийн хүүтэй таван жилийн хугацаатай авчээ. Үүний хүүг төлөхөд 2012 онд 24 тэрбум төгрөгийг улсын төсвөөс зарцуулсан бол өнөөдөр хүлээгдэж байгаа  20 гаруй тэрбум төгрөгийн зээлийн хүүгийн өр төлбөрүүд ар араасаа ундарч буй аж.  Оюутолгойгоос 250 сая ам.долларын урьдчилгаа гээд нийт 1.4 тэрбум ам.долларын зээл авч, үүнийгээ  бараг 100 хувь тэтгэвэр тэтгэмж, бэлэн мөнгө тараахад зарцуулжээ. Түүнчлэн гадаадын шууд хөрөнгө оруулалт 2012 онд 800 сая ам.доллараар буурсан нь Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах тухай хуультай холбоотой  гэж үзэж байгаа юм.  Дээрх үндэслэлээр буурсан эдийн засгийг эрүүлжүүлэхийн тулд 1.5 тэрбум ам.долларын “Чингис бонд”-ыг өнгөрсөн оны сүүлээр гадаад зах зээл дээр гаргасан. Үүнийг АН тайлбарлахадаа, "2013 оны нөхцөл байдал эдийн засгийн гадаад чадамж 50 хувь буурсан ч 1.5 тэрбум ам.долларын “Чингис бонд”-ын хөрөнгөөр эдийн засгаа урагшлуулах нөхцөл бүрдэв. Хэрэв бонд гаргаагүй байсан бол Монгол Улс элгээрээ мөлхөх байлаа. Тиймээс өмнө тавьсан эдийн засгийн ашиггүй өрүүдийг барагдуулах, үүнээс үүдсэн эдийн засгийн хүндрэлийг даван туулах гэсэн хоёр том ачааг энэ Засгийн үүрч байна. Тавантолгойн нүүрсийг нэг тонныг нь 70 ам.доллараар борлуулах гэрээ байгуулсан “Эрдэнэс тавантолгой”-н тэр үеийн захирал, Эрдэс баялгийн сайд нарт тус бүр хариуцлага тооцох. Дэлхийн зах зээл дээр 1 тонн нүүрс 110 ам.долларын үнэтэй байхад яагаад Тавантолгойн нүүрсийг 70 ам.доллараар борлуулахаар гэрээ байгуулав.Тавантолгойн Зүүн цанхийн нүүрсийн 80 хувийг яагаад зөвхөн хятадуудад борлуулахаар гэрээ байгуулав гэдгийн бүх учрыг олж цаашаа гэрээгээ сайжруулах талаар ажил хийгдэх ёстой" хэмээв. Ийнхүү АН-аас МАН-д хатуухан самар шидэж сануулга өглөө. Харин үүнийг МАН-ынхан үгүйсгэж байгаа юм. Өрийн ард намууд ийнхүү хөлөө жийлцэж бие биен рүүгээ буруугаа дохож буй нь энэ хаврын улс төрд өнгө нэмэх нь ээ.  Үнэхээр Д.Эрдэнэбатын ярьж байгаа үнэн бол МАН-ынхан үүнд хариу тайлбар хийх ёстой. Тэдний хийх тайлбар хүн бүхний сонирхлыг татаж, чихийг дэлдийлгэх л үлдлээ.