Ерөнхий сайдтай хамт Бурхан Халдун ууланд төөрсөн залуус улсыг хохиролгүй болгохоо мэдэгдэж мэдээлэл хийлээ. Тус хэвлэлийн хуралд Төв аймгийн Тамгын газрын ажилтан Т.Нямдорж, JCI төрийн бус байгууллагын Гантулга, MIIC компанийн ажилтан Идэрбат нар иржээ.

   Ерөнхий сайдтай хамт Бурхан Халдун ууланд төөрсөн залуус улсыг хохиролгүй болгохоо мэдэгдэж мэдээлэл хийлээ. Тус хэвлэлийн хуралд Төв аймгийн Тамгын газрын ажилтан Т.Нямдорж, JCI төрийн бус байгууллагын ажилтан Гантулга, MIIC компанийн ажилтан Идэрбат нар иржээ. 

    Эдгээр залуусын хэлж буйгаар "Бурхан Халдун ууланд авиралт хийгээд буцахдаа цаг агаарын хүндрэлээс болж саатсан Ерөнхий сайд Н.Алтанхуяг, түүнтэй хамт явсан хүмүүсийг эрж хайхад гурван нисдэг тэрэг оролцсон, 100-аад сая төгрөг зарцуулсан, зугаалж яваад улсын олон сая төгрөг үрсэн гэх мэдээлэл нь ор үндэсгүй" гэнэ. 

Мөн тухайн өдөр Ерөнхий сайд Улаанбаатараас 71 хүнийг дагуулж яваагүй бөгөөд эрлийн ажиллагаанд “МИ-171Е” дугаартай нэг л нисдэг тэрэг ажилласан байна. Тиймээс аяллын багт багтсан 71 хүнээс ажил үүргээ гүйцэтгэж явсан буюу төрийн тусгай албан хаагч болон онцгой байдлын албаны ажилчдыг хасч, 58 хүн хувиасаа мөнгө өгөхөөр болжээ. 14 сая 445 мянган төгрөгийг 58 хүнд хуваахад нэг хүнд 250 мянган төгрөг ногдож байгаа гэнэ. Мөнгө өгөх 58 хүний дотор Ерөнхий сайд Н.Алтанхуяг, Засгийн газрын хэрэг эрхлэх газрын дарга Ч.Сайханбилэг нар ч багтаж байгаа аж.

Ерөнхий сайдтай хамт ууланд явсан Гантулгаас хэдэн зүйлийг тодруулсан юм.

-    Эрлийн ажиллагаа хэдэн цагийн турш явагдсан бэ?

-  Бид оройн 05.00 цагийн үед отогтоо очно гэж төлөвлөсөн байсан. Оройн 05.00 цаг өнгөрчихөөд байхад ирэхгүй болохоор нь отогт үлдсэн хүмүүс ОБЕГ-т мэдэгдсэн гэсэн. Бид нар ууланд хоночихоод өглөөний 06.00 цагт отог руугаа хөдөлсөн. 10.00 цагийн үед ОБЕГ-ын ажилтнууд биднийг олсон. Сонин дээр хилийн цэргийнхэн олсон гэж бичсэн байсан. Уг нь ОБЕГ-ын ажилтнууд олсон юм. Модон дотор явж байхад нисдэг тэрэг ирээд биднийг отог руу зөөсөн.

-    Та бүхэн ерөнхий сайдын хамтаар хотоос хөдлөөгүй юм уу?

-    Бид нар тусдаа явсан. Бид нарын аялал ерөнхий сайдын авиралттай давхацсан. Түүнээс биш Ерөнхий сайд бид нарыг “Нааш ир. Нааш ир” гэж дуудаагүй. Бас JCI байгууллагынхан бүгд яваагүй хэсэг залуус л явж байсан. Бид нар Ерөнхий сайдтай ууланд таарсан. Таарах тохиолдол байдаг шүү дээ. Тэгээд хүчтэй шуурга болох үед бүгд баг болсон. Тал бүрээс нийлсэн 71 хүн байсан. Тэгэхэд Ерөнхий сайд бүгдийг нь дагуулж яваад тэнд очиж тансаглуулж байгаад ирсэн юм шиг зүйл яриад байх юм.

-    Та нарыг ууланд гарахад цаг агаар ямар байсан бэ?

-    Цас зөөлөн бударч байсан. Уулан дээр гараад буцахад шуурч эхэлсэн.