МАН-ын 25 гишүүн Ерөнхий сайд Н.Алтанхуягийг огцруулах санал гаргасан. Энэ талаар Төрийн байгуулалтын байнгын хорооны өчигдрийн хуралдаанаар оройн 20.00 цаг хүртэл хэлэлцлээ. МАН-ын гишүүд Ерөнхий сайд Н.Алтанхуяг үндсэн хууль зөрчиж албан тушаалын томилгоо хийсэн, эдийн засгийн өсөлтийг сааруулсан гэх мэт зургаан чиглэлийг үндэслэл болгосон юм. Өчигдөр болсон хуралд ерөнхий сайд өөрөө оролцож МАН-ын гишүүдийн асуултанд хариулсан. Тэдний дундах яриа сүүлдээ мэтгэлцээн болж ширүүссэн юм. Тус хуралдаанаар гишүүд асуудлыг бодитоор харах биш Ерөнхий сайдыг огцруулахын тулд нэг хэсэг нь холбоотой холбоогүй олон асуудлыг хамж шимэн асууж туйлширсан. Харин Ерөнхий сайд МАН-ын гишүүдийн хийсэн хэргийн талаар цохон ярьж хариу цохилт өгч байлаа. Энэ мэт буруутгах гэсэн асуулт буруугүй гэж тайлбарласан тайлбараар хуралдаан өндөрлөсөн. Эцэст нь Ерөнхий сайд Н.Алтанхуягийг огцруулах саналыг Төрийн байгуулалтын байнгын хорооны 18 гишүүнээс М.Энхболд, Сү.Батболд гэсэн хоёр гишүүн дэмжсэнээр уг санал дэмжигдээгүй юм. 

УИХ-ын гишүүн, МАН-ын дарга Ө.Энхтүвшин: Ерөнхий сайд Н.Алтанхуяг төрийн захиргааны жинхэнэ албыг нийтийн алба болгох нэрийдлээр зардал орон тоог үлэмж нэмэгдүүлж, хууль ёсоор сонгогдон томилогдсон төрийн бэлтгэгдсэн боловсон хүчнийг хомроглон халж нам эвсэл амраг садан, бизнсийн түнш, найз нөхөд гэсэн явцуу ашиг сонирхлоор ажил албан тушаалд томилж байгаагаас төрийн албаны чанар чансаа сульдаж төрд итгэх ард түмний итгэл сулран олон нийт бүхэлдээ айдас хүйтэст автах боллоо.

УИХ-ын гишүүн,  МАН-ын нарийн бичгийн дарга Я.Содбаатар: Монгол улсын Ерөнхий сайд хууль мөрдөж ажиллах ёстой албан тушаалтан. Гэтэл СХД-ийн дахин сонгуулийн үеэр Шинэчлэлийн Засгийн газрын тэргүүн цахим ертөнцөөр дамжуулж сурталчилгаа хийсэн. Сурталчилгаа хаасан үед тэр тусмаа дахин сонгуулийн үед сурталчилгаа явуулах нь хуулиар хориотой байдаг. Шинэчлэлийн Засгийн газарт нэг суудал нэн хэрэгтэй байна гэж цахим хуудсаар хийсэн сурталчилгаагаар сонгуулийн хуулийн хэд хэдэн заалтыг зөрчсөн гэж үзэж байна.

УИХ-ын гишүүн Сү.Батболд: Өмнөх Засгийн газар л буруутай гэж ярих юм. Энэ Засгийн газрын үед үзүүлэлт нь буурчихаар өмнөх Засгийн газар буруутай болчихдог шалтгаан үндэслэлийг нь юу гэж тайлбарлах юм.

УИХ-ын гишүүн Ч.Хүрэлбаатар: Эдийн засгийн үзүүлэлт үндсэндээ тэг болсон. Тэгсэн мөртлөө 9.8 хувийн инфляци байж байна. Энэ бол ололт биш юм. Үүнийгээ эргэж хар. Монгол банкнаас мөнгө хэвлэх замаар эдийн засаг руу чихэж болохгүй.

УИХ-ын гишүүн А.Тлейхан: Ард түмний амьдралыг дээшлүүлэхийн тулд хамтарч, зөвлөлдөе. Хэт улс төржилтөөс болж эдийн засаг унаж, гадаад хөрөнгө оруулалт зогсож байна.


Н.Алтанхуяг хариу ямар цохилт өгөв

Нэгдүгээрт: Би хөдөлгөөнгүй юм ярина. Тавантолой Чалкогийн хооронд байгуулсан  гэрээгээр 350 сая ам.долларын урьдчилгааг таван хувийн хүүтэй, таван жилийн хугацаатай авсан.  Урьдчилж авсан нь үнэн үү. Үнэн.  Өнөөдөр бид 350 сая долларын өрөө нүүрсээр дарж байна. Дараад, дараад чардайгаад 186 сая долларыг төлөх үлдээд байна. Би худлаа ярьдаггүй. Худлаа ярьж байна гэж үзэж байгаа хүн босоод хэл.

Хоёрдугаарт: Бондын асуудлыг М.Энхболд, Сү.Батболд нар мэдэж байгаа шүү дээ. Худлаа зүйл ярьж яах гээд байгаа юм. Би Ерөнхий сайд болохын өмнө Засгийн газрын хэрэг эрхлэх газрын дарга Ч.Хүрэлбаатар дээр ороод хэлсэн. “Хөгжлийн банкнаас авсан 600 сая долларын хүү чинь өсч байна. Та нар ямар нэгэн байдлаар арга хэмжээ авахгүй юм уу" гэж би хэлсэн. Гэтэл “Одоо бараг хугацаа үлдээгүй. Ямар нэгэн юм хийж чадахгүй юм байна” гэсэн. Хөгжлийн банкнаас авсан 600 сая долларыг хөгжлийн банкинд хөдөлгөөнгүй байлгасны төлөө бид улсын төсвөөс 24,3 тэрбум төгрөгийг төлсөн.

Оюутолгойгоос бид нар хамт сууж байгаад 250 сая долларын зээл авсан шүү дээ. Тэр мөнгийг хэн төлөх юм. Бид нар төлнө биз дээ.Тэр мөнгөөр ард иргэдэд нэг сая төгрөг тараасан биздээ.

Гуравдугаарт: Бондын хүүг гаргасан үедээ зарлагдсан хүү нь тэр хугацаандаа тогтмол байдаг. Өнөөдөр бид 500 сая долларын бондыг таван жилийн хугацаанд гаргасан. Түүний хүү нь тогтмол бөгөөд хүү нь 1.25 хувийн хүүтэй.

Дөрөвдүгээрт: Би дахин сонгуулийн үеэр сурталчилгаа хийгээгүй. Ер нь иргэдийгээ саналаа өгөөрэй гэж уриалсан. Шинэчлэлт өөрчлөлт Монгол улсад хэрэгтэй гэж хэлсэн. Түүнийгээ би сурталчилгаа гэж ойлгохгүй байна.

Тавдугаарт: Хөвсгөл аймгийн засаг даргаар Ганболдыг томилох гэхэд АТГ-аас “Наад хүн чинь Хөвсгөл аймагт болсон ноос ноолуурын тендерийн авлигалын хэрэгт холбогдсон” гэж хэлсэн. Тиймээс би буцаасан.

Юу болохоороо та нар хууль ярьдаг юм. Бас юу болохоороо худал хэлдэг юм. Үүнийг би дэндүү тэвчиж байгаа. Хүмүүс “Яах юм. Н.Алтанхуяг аа. Урагшаа хараад л ажиллая. Цөөхөн хэдэн монголчууд нэг нэгнийгээ чи би гээд яах юм" гэж хэлж байсан. Гэтэл та бүгд өнөөдөр 25-уулаа нийлж байгаад намайг огцруулах шаардлага тавьж байгаа учраас бүх зүйлийг ил тодоор хэлж байна.