Яг одоо УИХ-ын нэгдсэн чуулганаар Ерөнхий сайдыг огцруулах асуудлыг хэлэлцэж байна. УИХ-ын гишүүд Ерөнхий сайдыг огцруулах үндэслэлийн талаар асуулт асууж, хариулт авч байна.

УИХ дахь МАН-ын гишүүд Ерөнхий сайдыг хэд хэдэн удаа хууль зөрчиж ажилласан. Тиймээс хууль зөрчдөг ерөнхий сайдтай хамтарч ажиллахгүй гэдгээ хэллээ. Хуралдааны үеэр М.Батчимэг гишүүн МАН-ын бүлгийн дарга Н.Энхболдоос "Засгийн газар огцроно гэдэг нь маш том донсолгоо.  Засгийн газар огцорлоо гэхэд та бүгд гадаадын хөрөнгө оруулалтыг сайжруулах, улс орны амьдралыг дээшлүүлэх тооцоолол гаргасан уу. Мөн Засгийн газарт хамтрах эрмэлзлэл байгаа гэж ойлгож болох уу" гэж асуулаа.

Н.Энхболд хариулахдаа "Бид Ерөнхий сайдыг хууль зөрчсөн гэж үзсэн. Нийгэмд юу болох бол гээд хууль зөрчдөг Ерөнхий сайдтай байгаад байх нь зөв үү. Ерөнхий сайд нь хууль зөрчөөд байхад гадаадын хөрөнгө оруулалт буурч байна шүү дээ.

Засгийн газарт хамтрах сонирхол бидэнд байхгүй. Бид сөрөг хүчин байна. Хэн нэг нь хууль зөрчиж байвал бид дахин дахин Засгийг газрыг огцруулах асуудлыг тавих болно" гэлээ.

Энэхүү асуултад МАН-ын дарга Ө.Энхтүвшин нэмж хариулахдаа "Бид одоогийн Засгийн газрыг унагаж өөрсдөө эрх мэдэлд суух санаагүй. АН-д Н.Алтанхуягаас илүү сайн хүн бий. Бид та нарт туслах гэж байна. Хууль зөрчдөг Ерөнхий сайдаар яах юм" гэв.

Харин Ерөнхий сайд Н.Алтанхуяг энэ үеэр хэлэхдээ "Бид өнөөдөр сандал ширээний тухай ярих биш жинхэнэ ар иргэдийн дундах асуудлаа хамтраад шийдэх хэрэгтэй. Бидний хийж чадахгүй байгаа ажлыг хэлээд өг. 7000 хүнийг хомроглон халсан тухайд "Байнгын хороон дээр би ярьсан. 7000 хүнийг халсан зүйл байхгүй. Та нар бодитой тоо баримт авчраад ийм асуудал тавь". Хоёр хоног өнгөрлөө. Тодорхой баримт бичиг надад авчирж өгөөгүй байна.

Ерөнхий сайдыг огцруулах асуудал үргэлжилж байна.