УИХ-ын үдээс хойшхи хуралдаан Ерөнхий сайдыг огцруулах асуудлаар үргэлжилж байна. Хуралдаанаар О.Содбилэг гишүүн Ерөнхий сайд Н.Алтанхуягаас яг одоо Засгийн газар бүтээн байгуулалтын ямар ажил хийж байгаа болон бондын мөнгө бүх бүтээн байгуулалтыг хийхэд хүрэлцэх үгүй талаар гэж асуулаа. Харин Ерөнхий сайд Н.Алтанхуяг хэлэхдээ "Бүтээн байгуулалтын ажил хоёр бүрэлдэхүүнээр явагдаж байгаа бөгөөд нэг хэсгийг нь бондын мөнгөөр нөгөө хэсгийг нь улсын төсвөөс болон хөрөнгө оруулалтаар хийгдэнэ. Бид нэгдүгээрт Тавантолгойн цахилгаан станцын барилгад 50 сая доллар өгөхөөр төлөвлөж байгаа. Мөн тус ажилд хөрөнгө оруулагчид хөрөнгө оруулна. Энэ станцаас Монгол улс 34 хувийг эзэмшинэ гэсэн. Гудамж төсөлд 200 сая доллар гаргана. Хурдны зам шинэ болон төмөр замд улсын төсвөөс тус тус 200 сая доллар гаргана. Мөн тус ажилд гадны хөрөнгө оруулалт оруулна. Мөн ноолуурын компаниудад 95 саяыг өгнө. Ноос, сүү, үнээний фермийг дэмжинэ. Энэ бүх ажилд бондын мөнгөнөөс тодорхой хэмжээгээр өгнө. Зургаан аймгийн замыг засмалаар холбоход 570 тэрбум төгрөг гарна. Харин "ТЭЦ V" дулааны станцыг барихад бондын мөнгөнөөс өгөхгүй. Нефть боловсруулах ажил болон Хөшгийн хөндийн онгоцны буудалд Японы засгийн газрын зээлээр босно. Зургаан аймгийн замын 1800 км замаас 1400 км замыг нь энэ жил тавих төлөвлөгөөтэй байна. Нефть импортлогч компаниудад бүгдэд нь хөнгөлөлттэй зээл өгсөн. Харин дугаарын хязгаарлалты хэрэгжүүлж эхэлснээс хойш бензиний хэрэглээ багассан гэсэн тоо баримт байна. Мөн барилгын компаниудыг дэмжээд эхэлсэн. Буянт- Ухаад баригдах 1575 айлын орон сууц барих компанид газрыг нь үнэгүй өгч дэд бүтцийг нь шийдэж өгсөн. Хариуд нь тэд чанартай орон сууц барьж хямд өгөх ёстой. Бондын мөнгийг зориулалтын дагуу хэрэглэж байна. Ирэх намар дараагийн бондыг гаргана" гэж хэллээ.
Т.ХУлан
Сэтгэгдэл (1)