Ерөнхий сайд Н.Алтанхуяг өнөөгийн эдийн засгийн доройтол, гадаадын хөрөнгө оруулагчид гарч явсан, ажилгүйдэл ядуурал нэмэгдсэн, юмны үнэ өссөн зэрэг болохгүй бүтэхгүй бүхэн өмнөх Засгийн газраас улбаатай гэж хэлсэн. Тэр ч бүү хэл өмнөх ерөнхий сайд С.Батболддоо хандаж “Алийн болгон баасыг чинь цэвэрлэх вэ дээ” хэмээн уурласан удаатай.

Үнэхээр улс орны эдийн засгийг хүндрүүлж байгаа бүхэн өмнөх Засгийн газрын буруу бодлого уу гэдэгийг авч үзвэл ихээхэн өөр дүр зураг харагдах боллоо. Өмнөх Засгийн газрыг удирдсан МАН-ынхан гэхээсээ илүү өмнөх Засгийн газарт орж ажилласан АН-ынхан хамаг муу муухай бүхнийг хийгээд өнөөдөр өөрсдөө түүн дээрээ хальтарч унаад ихээхэн хэцүү байгаа бололтой.

Энэ бүхнийг баримт тулгуурлан тайлбарлаж болно. Оюутолгойн гэрээг хамгийн муу гэрээ гэж хүн бүхэн шүүмжилж байна. Өнөөдөр энэ гэрээнээс болж хөрөнгө оруулагчид гарч явлаа гэж ярих ардчилалынхан олон. Тэгвэл энэ гэрээнд тухайн үеийн гурван сайд гарын үсэг зурсан. Хоёр нь АН-ынх. Нэг нь МАН-ынх. Аль нам нь Оюутолгойн гэрээн дээр нөлөөтэйгээр оролцсон нь тооны хувьд ингэж харагдана.

Өөр нэгэн болж бүтэхгүй байгаа гэж яригдсан асуудал бол БНХАУ-ын Чалькотой байгуулсан нүүрсний гэрээ. Энэ компанитай гэрээ хэлэлцэл хийх асуудлыг Н.Алтанхуяг өөрөө удирдсан. Н.Алтанхуяг өөрөө Тавантолгойн гэрээ хэлэлцээг ахалж байсан. Тавантолгойн орд газрыг хариуцсан захиралаар Н.Алтанхуяг тэргүүтэй АН-ынхан ярилцаж байгаад Соцдекээс гаралтай Б.Энэбиш гэж өөрийн хүнээ тавьсан. АН-ын уул уурхайн салбарын гол тоглогч Б.Энэбиш өмнө нь “Эрдэнэс MGL” компанийн захиралаар ажиллаж байсан. Уг компани нь Оюутолгой, Тавантолгойг хариуцсан толгой компани нь. АН-ын Б.Энэбиш дараа нь “Эрдэнэс Тавантолгойн” захирал болсон. Энэхүү “Эрдэнэс Тавантолгой” компанийн ТУЗ-д одоогийн АН-ын УИХ-ын гишүүн Ж.Батзандан ажиллаж байсан. Ийнхүү АН-ынхан удирдаж, өөрсдөө ТУЗ-д нь байсан “Эрдэнэс Тавантолгой” компанийн захиралаар очсон Я.Батсуурь энэ компанийг болж бүтэхгүй, идэж уусан гэж баахан шуугиулсан. Үнэндээ бол өөрсдийнх нь намын хүмүүс л тийм болгосон шүү дээ.

“Хүний хөгжил сан”-гийн мөнгийг өгөх гэж асар их зээл аваад одоо улс орон өрөнд орж өтөнд баригдлаа гэсэн. Үүнийг өмнөх Засгийн газар хийсэн гэж Н.Алтанхуяг мэдэгдэх болсон. Үнэндээ бол энэ ажлыг Н.Алтанхуяг өөрөө хийлцсэн. Худлаа гэвэл тухайн үеийн ерөнхий сайд С.Батболдын дэргэд аавдаа загнуулсан хүүхэд шиг таг сууж байгаад л иргэн бүртээ мөнгө өгөхөөр боллоо гэж хэлсэн бичлэг нь телевизүүдийн архивт байж л байгаа. Бас “Хүний хөгжил сан”-ийн мөнгийг босгох ажлыг Сангийн сайдын хувьд С.Баярцогт хариуцаж гаднаас зээл авсан.
Энэ мэтээр баримт дурдаад яривал Н.Алтанхуяг сайд болохгүй бүтэхгүй гээд байгаа бүхнээ өөрөө л хийж байсан байна шүү дээ. Өөрсдийнх нь намынхан л хийж байж. Харин ч МАН-ынхан хамтарсан нэрээр ухаан гаргаж хамаг болохгүй бүтэхгүй, ээдрээтэй бүхнийг АН-ынхнаар, Н.Алтанхуяг тэргүүтнээр хийлгэж өөрсдөө болохоор суугаад үлдэж. МАН-ын энэ залийг Н.Алтанхуяг өнгөрсөн хойно нь ухаарчихаад, өөрсдөөр нь юу хийлгэж байсныг хожуу мэдсэндээ халуурч элдэв юм ярьдаг болсон юм биш үү?