“Алийн болгон баасыг чинь цэвэрлэх вэ дээ”... Энэ долоо хоногийн хамгийн шилдэг ишлэл үгээр ерөнхий сайдын энэ өгүүлбэр шалгарч магадгүй болоод байна. Н.Алтанхуяг ам халж, сэтгэл хөдлөхөөрөө унагадаг зөөлнөөр хэлбэл сул үг, хатуухан хэлбэл хариуцлагагүй мэдэгдлээрээ хэвлэлийнхэн, сөрөг хүчин хоёрыг хэсэгтээ л ажилтай байлгадаг улс төрч гэдгээ дахин нотоллоо. “Та нар яасан их хууль мөрддөг юм, айн?”, “Би унгаж ч болохгүй юм байна л даа” зэрэг үгс ч алдарт “баасны” араас нэхэж явна.

Өнгөрч буй долоо хоногийн улс төрийн сонирхолтой үйл явдлууд харин манай улс төрд цэвэрлэх ёстой өөр “баас” байгааг тод томруун харууллаа гэж энгийн иргэд харж байна. Эрх барьж буй, эрх барилцаж буй, сөрж, сөрүүлж байгаа бүх л улс төрийн хүчнүүд овоо том “б...с”-нд хутгалджээ гэдгийг. Хэзээ, хэн нь хэнтэйгээ хэрхэн хамтарч, хэлэлцэж, хэрэлдэж, нэг “жорлонд” яаж суусныг нь эрх биш мартахаар хугацаа өнгөрөөгүй байна.
 
 Оюутолгойн гэрээг хамгийн муу гэрээ гэж хүн бүхэн адлан чичилж, жадлан шүүмжилж байна. Өнөөдөр ан мана үзэлцэж байгаа АН, МАН хоёр батлуулж, чухам хамтарсны ач гавьяа хэмээн намрын тэнгэрт яруу хөгжим эгшиглүүлж байсан нь ердөө дөрвөн өвлийн өмнөх явдал. УИХ 2009 онд “Оюу толгой” төслийн гэрээ хэлэлцээний замыг засч Аж ахуйн нэгжийн орлогын албан татварын тухай хуулийг 86,9 хувь, Авто замын тухай хуулийг 88,3 хувийн саналаар батлаж өгч байсан юм. Гэнэтийн ашгийн татварыг тэглэх тухай хууль тухайн үеийн УИХ дахь МАХН, АН-ын гишүүдийн 85 хувийн дэмжлэгтэйгээр, Усны тухай хууль 90.9 хувийн саналаар батлагджээ.  Гэрээнд тухайн үеийн гурван сайд гарын үсэг зурсан. Хоёр нь АН-ынх. Нэг нь МАН-ынх. Уучлаарай, ээлжлэн эрх баригч, сөрөг хүчин болж тоглодог намуудын гар ерөнхий сайдын уулга алдсан “б...с”-тай аль хэдийн адилхан хутгалджээ.

БНХАУ-ын “Чалко” компанитай байгуулсан нүүрсний гэрээ болон Тавантолгойн хэлэлцээг Н.Алтанхуяг өөрөө ахлан удирдаж байсан гэж өнөөгийн болон өмнөх УИХ-ын зарим гишүүд барим тавим сануулж байна. Чухам түүний саналаар АН-ын уул уурхайн салбарын гол тоглогч, “соцдек” гаралтай Б.Энэбиш төрийн өмчит “Эрдэнэс Тавантолгой”-н захирал болж, “Эрдэнэс Тавантолгой” компанийн ТУЗ-д одоогийн УИХ-ын гишүүн Ж.Батзандан ажиллаж байсан нь бас л тэрхүү “нэг жорлонд” сууж байсан үеийнх нь үйл явдал.

Өнөөдөр өөд өөдөөсөө хэрсэн бух шиг тулж үзэж байгаа С.Батболд, Н.Алтанхуяг хоёр “Хүний хөгжил сан”-гийн мөнгийг иргэн бүртээ өгөх боллоо гэдэг гаргчигтайгаар мэдээ нь цацагдах хэвлэлийн хурал дээр хамтдаа л сууж байсан. Оны онцлох үйл явдлаар золтой л шалгарчихаагүй тэр шийдвэр одоо эдийн засгийг маань баллаж, балиартуулсан бас нэгэн “баас” болчихжээ.

Гарц, арга зам, нийтлэг эрх ашиг гэдэг юмыг манай улс төрчдөөс, улс төрийн намуудаас харж хүлээгээд хэрэггүй болжээ. Хожоо, оноо, ашиг гэдэг түрхэн зуурын эрх ашиг, инстинкт нь л тэднийг нийлүүлж, нэгтгэж, салгаж, тэмцэлдүүлж байна. Энэ л харин хамгийн түрүүн цэвэрлэх ёстой “б...с” юм.