Сүүлийн үед МАН ихээхэн бужигнаантай байна. Засгийг огцруулах санаачилга нь үр дүн муутай болсон учраас завсарлага авсан. Завсарлага авсан сөрөг хүчин амралтын өдрүүдэд ч зүгээр суусангүй. УИХ-ын 25 гишүүний 20 нь Дархан хотод очиж ард иргэдтэй уулзлаа. Энэ уулзалтаар чуулганы танхимд Засгийн газрыг шүүмжилснээсээ ч илүү шүүмжлэлүүдийг өрнүүлсэн байна. Ард иргэдийн бухимдал ч хөдөө орон нутагт багагүй байгаа бололтой. 

Бухимдалтай байгаа ард иргэдийн санаа сэтгэл дээр бухимдал дүүрэн сөрөг хүчин тоглолт хийхээр үр нь мэдээж гарцаагүй сайн гарна. Өөрөөр хэлбэл ард иргэд ч, ардын намч уулзалтыг онц гэсэн дүнтэйгээр хаажээ. 
 
Харин уулзалтын үеэр олон асуудал хөндсөний нэг нь танай нам ерөнхийлөгчийн сонгуульд хэнийгээ дэвшүүлэх гээд байна вэ?, нэр дэвшигч байхгүй гэсэн элдэв яриа гараад байгаад ард иргэд, намын гишүүд нь хариулт нэхжээ.      

Намын дарга Ө.Энхтүвшин ч, УИХ-ын бусад гишүүд нь ч гэсэн хангалттай боловсон хүчинтэйгээ хангалттай тайлбарлажээ. Тэгтэл нэгэн эрхэм УИХ-ын гишүүн Д.Оюунхоролоос “Таны нэр дуулдаад байна. Та нэр дэвших үү?” хэмээн тулгаж асуужээ. Харин Д.Оюунхорол гишүүн  “Еренхийлегчийн сунгаанд МАН-ын бага хурал хvртлэх бvх сонгон шалгаруулалтад оролцоход бэлэн байна” гэдгээ мэдэгдсэн байна. Өөрөөр хэлбэл тэрээр ерөнхийлөгчид өрсөлдөхөд бэлэн гэдэгээ албан ёсоор ингэж зарлажээ. Түүний тайлбараар бол намынхаа бага хурал хүртэл дэвшихийн төлөө явна, харин асуудлыг бага хурал л шийднэ гэсэн үг юм. Ийнхүү Монголын улс төрд анх удаа эмэгтэй хүн нэр дэвшихэд бэлэн гэдэгээ зоригтойгоор тунхаглалаа. Нам доторх сунгаанд ч өнгөлж эхэллээ. 

МАН яг одоо гишүүдийнхээ дунд удахгүй болох ерөнхийлөгчийн сонгуульд хэнийг нэр дэвшүүлэх вэ? гэсэн санал асуулга явуулж байгаа. Одоогийн байдлаар энэ санал асуулгыг МАН-ын дарга Ө.Энхтүвшин, УИХ-ын гишүүн Д.Оюунхорол, Б.Бат-Эрдэнэ гэсэн гурван эрхэм тэргүүлж буйг МАН-аас албан бусаар мэдэгдээд байгаа. Ийм мэдээлэл ч хэвлэлийн хуудсыг чимж эхэлсэн. 

Ө.Энхтүвшин, Д.Оюунхорол хоёр бол эртний сайн найзууд. Учир нь Ө.Энхтүвшинг намын дарга болгох гэж удаа дараа Д.Оюунхорол улайран зүтгэж байсан. Харин энэ удаа хоёр найзын дунд намын гол өрсөлдөөн болж дархан аварга “аварга” болж чадахгүй л болов уу? Нөхцөл байдал ингэж эргэвэл найзан дундаа асуудлыг шийдвэрлэж Д.Оюунхорол нэрээ татаж, Ө.Энхтүвшинг дэвшүүлэх магадлалтай юм.

Гэхдээ зориг, итгэл төгс байгаа Д.Оюунхорол гишүүнийг ч дэвшүүлэхийг хэн байг гэхэв. Тэгвэл Монголын улс төрийн түүхэнд нэгэн шинэ хуудас бичигдэнэ. Анхны эмэгтэй нэр дэвшигч. Ялах эсэхийг ард түмэн л мэднэ. Уг нь хүн амын олонх буюу 51 хувийн төлөөлөлөөс дэвшиж байгаа гэдэг давуу тал. Жендер, эмэгтэйчүүдийн тэгш эрх, эмэгтэйчүүдийн улс төрийн оролцоо ярих болсон өнөө үед эвгүй л нэр дэвшигч. Яг цагаа тулаад ирвэл эмэгтэйчүүд нь эмэгтэй нэр дэвшигчээ дэмждэгүй дэлхий дахины хандлага бий. Эрчүүд нь харин эмэгтэй нэр дэвшигчийг дэмждэг. Гэхдээ сүүлийн үед эмэгтэйчүүдий дэмжиж эхэлж байгаагийн жишээ бол БНСУ-ын ерөнхийлөгчөөр эмэгтэй хүн сонгогдсон явдал юм.

Ийнхүү МАН-ын гишүүдийнхээ хамгийн олонхийн санал аваад байгаа УИХ-ын гишүүн Д.Оюунхорол итгэл хүлээлгэвэл зүтгээд үзнэ гэдгээ нөхөддөө дуулгалаа. Харин намынх нь нөхөд асуудлыг ирэх сарын ихээр болох бага хурлаараа хэлэлцэхээр бэлтгэж байна.