Ийм мэдээлэл МАН-ын бүлэгт иржээ. Гэхдээ Н.Алтанхуягийг огцруулах бичигээ өргөн барьсны дараахан энэ мэдээлэл сөрөг хүчний гарт хүрчээ. Нэгэнт огцруулах үндэслэлээ өргөн барьсан МАН-ынхан УИХ-ын чуулганы үеэр асуугаад хариулахгүй бол өөр арга ольё гэж тохирсон байна.   
Асуудал МАН-ын төлөвлөсний дагуу өрнөжээ. Ерөнхий сайдаас танай дүүгийн компани Тавантолгойн тендерт орж ялсан талаар тайлбар хийхгүй юу гэхэд бараг л насанд хүрсэн хүмүүсийн асуудлыг би мэдэхгүй. Өөрийнхөө төрсөн хүүхдүүдийн асуудлуудыг л мэднэ гэсэн утгатай юм хэлээд тодорхой хариулт өгөлгүй бултсан юм. Засгийн тэргүүн хариулахаас ингэж татгалзсан нь ихээхэн хар дагуулсан. Үнэхээр ороогүй бол тийм юм байхгүй гээд л тас хариулж, хардлагад цэг тавьж болох байсан ч тэр тэгсэнгүй. 

Тавантолгойн гэрээг өмнөх Засгийн газар ашиггүй байгуулсан. Манай шинэчлэлийн Засгийн газар ашигтай гэрээ болгоно гэж мэдэгдээд үйл ажиллагааг нь зогсоосон. Гурван сар гаран үйл ажиллагаагаа явуулаагүй Тавантолгой өчигдөрөөс эхлээд хэвийн ажиллаж эхэллээ. Гэхдээ нүүрснийхээ үнийг нэмсэнгүй. Яг л өмнөх Засгийн газрын байгуулсан анхны үнээр гаргаж эхэлсэн мэдээлэл байна. Энэ үнийг ашиггүй, нэг тонн тутамдаа 6 ам долларын алдагдалтай гээд Засгийн тэргүүн мэдэгдээд сайжруулна гэсэн. Тэгсэн мөртлөө сайжруулсангүй. 6 ам долларын алдагдал гэдэгээ ч ярихаа болилоо. Энэ юу болж байна вэ ард түмээн?
Эндээс нэгэн хардлага төрж байна. Тавантолгойг бүтэн гурван сар зогсоож ашиггүй, алдагдалтай гэрээ байгуулсан гэж ард түмний тархийг угааж, сөрөг хүчнээ үгүйсгэж байгаад нэг л өдөр өмнөх үнээр нь ачуулж эхлэв. Ингэх байсан юм бол яах гэж бүтэн гурван сар сул зогсолт хийж өчнөөн ард иргэдийг цалингүй байлгасан бэ? Улс орны эдийн засгийг яах гэж ингэж хохироосон бэ? Яах гэж? Ерөнхий сайдын ах дүүгийн kомпанийг оруулах л гэж л ийм юм хийсэн бололтой. Өөрөөр хэлбэл Тавантолгойн гэрээг ашигтай болгох гэж биш Ерөнхий сайдын хамаатнуудыг бизнестэй болгох гэж бүтэн гурван сар улс орны эдийн засаг элгээрээ мөлхсөн болж таарах нь. Ийм дүгнэлтийг МАН-ийнхан хийж эхлээд байгаа аж. Тэд энэ дүгнэлтээ баталгаажуулахын тулд Ерөнхий сайдыг огцруулах үед ихээхэн зөрүүтэй гарсан тоо баримтуудыг шалгах хамтарсан ажлын хэсэг байгуулах хүсэлтийг УИХ-ын даргад өргөн барьжээ. МАН-ынхан тоо баримт гэхээсээ илүү Тавантолгойд Ерөнхий сайд гараа шургуулсан байна уу гэдэгийг АН-ынхантай хамтарч судлахыг хүссэн хэрэг. УИХ-ын дарга шууд татгалзжээ. Тэгэнгүүт нь МАН уг асуудлыг судалж дүгнэлт гаргаад ирэх долоо хоногийн бүлгийн хуралдаа танилцуулах ажлын хэсгийг байгууллаа. Ажлын хэсгийг бүлгийн дэд дарга С.Бямбацогт тэргүүлж бүрэлдэхүүнд нь УИХ-ын гишүүн Ч.Хүрэлбаатар, Я.Содбаатар, Ж.Энхбаяр, Л.Энх-Амгалан, Ж.Батсуурь, А.Тлейхан, Д.Оюунхорол, Д.Хаянхярваа нар ажиллахаар болов. Тэд Ерөнхий сайдын хамаатны дүүгийнх гэх “Gobi Power” kомпани Тавантолгойн нүүрсийг тээвэрлэх тендерт шалгарсан эсэх асуудлыг судлахаар энэ долоо хоногт “Эрдэнэс Тавантолгой” ХК-д ажиллах гэж байна. 

Харин АН-ын бүлэг өчигдөр хуралдаж Тавантолгойн нүүрсийг гаргаж эхэлснийг дэмжжээ. Гэхдээ хэний kомпани гаргаж байгаа вэ? ашиггүй гэрээ гэж баахан сурталчилсан мөртлөө яагаад хуучин үнээрээ гаргах болсон бэ? Ингэх л байсан юм бол гурван сарын хугацаанд нүүрсээ зөөсөн бол бидэнд л хэрэгтэй байсан гэх мэтээр маргалдсан сурагтай. Тогоон дотроо ингэж маргалдсан эрх баригчид гаднаа бол “Эрдэнэс Тавантолгой” компанийн хувьд нүүрс тээвэрлэлтийг ийн үргэлжлүүлсэн нь зардлыг нэлээд багасгах замаар алдагдлаа бууруулж, алдагдалгүйгээр нүүрсээ нийлүүлэх боломжтой болсонтой холбоотой гэж ойлгоход төвөгтэй тайлбарыг хийсэн. Өөрөөр хэлбэл зардлыг багасгасанаар алдагдалгүй боллоо гэв. Зардал багасгана гэдэг бол ажилчидаа хална, захиргааны зардлаа багасгана гэсэн үг. Гэхдээ тэд ингэж биш тонн тутамдаа 6 ам долларын алдагдал хүлээж байгаа гэрээг л ашигтай болгоно гэж хэлснээ мартсан бололтой. Эсвэл даргынхаа хэлсэн энэ үгийг ард түмнийг мартсан гэж бодсон юм уу? Ийм л тайлбартай үлдэж.

Ийнхүү Тавантолгойн нүүрсийг гурван сар зогсоогоод хуучин үнээр нь гаргаж эхэлж байгаа гэсэн мэдээлэл ихээхэн дуулиан тарих нь тодорхой боллоо. Гэрээг ашигтай болгох гэж биш Ерөнхий сайдын дүүгийн kомпанийг оруулах гэж гурван сар зогсолт хийсэн бол жинхэнэ супер дуулиан болж мэдэх юм.