Ерөнхий сайдыг огцруулах асуудлыг хэлэлцэх үеэр улс орны эдийн засагтай холбоотой тоонууд ихээхэн зөрүүтэй байсан. Эдгээр тоог тодорхой болгохоос гадна Ерөнхий сайдын дүүгийн kомпани Тавантолгойн орд газраас нүүрс гаргаж байгаа юу гэдэгийг шалгах хамтарсан ажлын хэсэгийг байгуулахыг МАН-ын бүлэг УИХ-ын даргад хандаж хүсэлт гаргасан. Харин УИХ-ын дарга З.Энхболд боломжгүй гэсэн. Ийм хариу сонссон МАН дангаараа ажлын хэсэг байгуулж “Эрдэнэс Тавантолгой” ХК ийн үйл ажиллагааг шалгах болсоноо өчигдөр мэдэгдлээ. Харин уг мэдэгдэлийг сонссон УИХ-ын дарга З.Энхболд “МАН-ын бүлэг ажлын хэсэг байгуулж шалгалт хийх эрхгүй. Харин мэдээлэл авч болно” гэж албан бусаар тайлбар хийсэн байна. Ийнхүү сөрөг хүчийг шалгалт хийх эрхгүй гэдэг шалтгаанаар Ерөнхий сайдын дүүгийн компани тендерт ялж Тавантолгойгоос нүүрс гаргаж байгаа эсэхийг батлах бололцоогүй болоод байгаа аж.