Ерөнхийлөгчийн өнгөрсөн хугацаанд дэвшүүлсэн хэд хэдэн ажлыг Монголын оюутнууд дэмжиж ажиллаж ирснийг МОХ-ны ерөнхийлөгч Х.Батсайхан уулзалтын эхэнд хэллээ. Дээд боловсролын санхүүжилт, оюутны үндэсний тэтгэлэг амьдралд хэрэгжиж оюутнуудад урам зориг өгсөн. Оюутны 70 мянган төгрөг амьдралд хэрхэн үр ашгаа өгсөн талаар орон даяар эссе бичлэгийн тэмцээн зохиосон талаар тэрээр танилцууллаа. Оюутнууд үндэсний тэтгэлгээ нийлүүлж нийгэмд тустай, өөрсдийн ахуй амьдралд нэмэртэй ажил хийдэг жишээ ч цөөнгүй байгаа аж. Хамтарсан бүтээл хийж борлуулдаг, студи байгуулсан, гар урлалын үйлдвэрлэл явуулж байгаа зэрэг жишээг энэ үеэр дурдсан юм.
 
МОХ-ны зүгээс их, дээд сургуулийн оюутнууд суралцаж байх хугацаандаа цэргийн алба хаах, энэ нь хожим төрийн албанд ажиллахад дөхөм болох талаар санал дэвшүүлж байлаа. Монгол Улсын Ерөнхийлөгч нь Зэвсэгт хүчний ерөнхий командлагчийн хувьд “Оюутан-цэрэг” хөтөлбөрийг үндэсний хэмжээнд хэрэгжүүлэхэд хамгийн гол дэмжих субъект юм хэмээн үзэж уг саналыг танилцуулж байгаа юм байна. Оюутнуудыг жил бүрийнх нь зуны амралтаар, гурван жилд тус бүр дөрвөн сарын хугацаатай цэргийн алба хаалгахад нэг жилийн цэргийн алба хаасан хугацаатай тэнцэнэ. Ингэж оюутан байхдаа цэргийн алба хаах нь ашигтай гэдгийг оюутнууд төдийгүй эцэг эхчүүд дэмжиж байгаа юм байна. Монгол Улсын Ерөнхийлөгч “Оюутан-цэрэг” хөтөлбөрийг судалж үзнэ гэдгээ хэллээ.
 
Уулзалтын үеэр мөн оюутны дотуур байрны асуудал хөндөгдөв. Нийслэлд хөдөө орон нутгаас 53 мянган оюутан ирж суралцаж байгаа. Тэднээс 13400 оюутныг дотуур байраар хангажээ. Үндэсний тэтгэлэг 70 мянган төгрөг авдаг болсноос хойш оюутны сурлагад ахиц гарсан. Одоо дотуур байр тулгамдсан асуудал болсныг МОХ-ны ерөнхийлөгч Х.Батсайхан Монгол Улсын Ерөнхийлөгчид танилцуулав.