УИХ дах МАН-ын бүлгээс ажлын хэсэг гарч Тавантолгойн тендэрт Ерөнхий сайдын хамаатны компани оролцож, ялсан эсэхийг тодруулах, Монголбанк Чингис бондын мөнгөөр их хэмжээний алт худалдан авсан эсэх мөн төрийн албаны орон тоо өмнөхөөс хэдэн хувиар өсөв гэдгийг тус бүр тодруулахаар хоёр өдөр ажилласан билээ.
Тус ажлын хэсэгт УИХ-ын гишүүн Ж.Энхбаяр, С.Бямбацогт, Д.Оюунхорол зэрэг багтаж байгаа юм. Эдгээр гишүүд өнөөдөр сэтгүүлчдэд мэдээлэл хийлээ. Ажлын хэсгийнхэний ярьж буйгаар Тавантолгой компанийн тендэрт “Говь повер” компани оролцож ялалт байгуулсан болохыг тогтоожээ. Тендэрт ялсан тус компанийн захирал Г.Уянга нь Засгийн газрын хэрэг эрхлэх газрын дэд дарга Г.Дэнзэнгийн гэргий, Ерөнхий сайд Н.Алтанхуягийн дүүгийнх нь төрсөн охин аж.  Харин Г.Дэнзэн нь Засгийн газрын хэрэг эрхлэх газрын дэд даргын алба хашихын зэрэгцээ “Эрдэнэс тавантолгой” компанийн ТУЗ-ийн даргаар ажилладаг.

    “Говь повер” компанийн хувьд Тавантолгойн тендэрт оролцохоос өмнө нэг сая төгрөгийн хөрөнгөтэй байсан. Түүнийг нь Г.Уянга худалдан авч нэг өдрийн дотор бичиг баримтыг нь өөрчилж нэг тэрбум төгрөгийн хөрөнгөтэй болгож тендэрт оролцоод долоо хоногийн дараа 17.7 тэрбум төгрөгийн үнэтэй тендэрийг авчээ. Уг нь “Эрдэнэс тавантолгой” компанийн шинэ захирал Тавантолгойн уурхай дээр гаалийн бүрдүүлэлт хийгээд нүүрсээ гаргая гэхэд Гаалиас хүлээн зөвшөөрөөгүй. Гэтэл дунд нь “Говь повер” компани гарч ирж энэ ажлыг хийхээр тендэрт шалгарсан нь төрийн компаниудыг зохион байгуулалттайгаар үнэгүйдүүлж, дундаас нь хөрөнгө мөнгө завшдаг завхрал руу явуулж байгаа болохыг УИХ-ын гишүүн Ж.Энхбаяр мэдэгдлээ.

    Тавантолгойн орд бол Монголын нийт ард иргэдийн өмч. Иргэн бүр тус ордоос 1072 ширхэг хувьцаа эзэмшдэг. “Эрдэнэс тавантолгой” компанийн үйл ажиллагаа сайн байвал ард иргэд хувьцаагаа эзэмшээд ногдол ашиг хүртэх ёстой. Нөгөө талаас 1000 гаруй компани хувьцаа худалдан авахаар мөнгөө төлсөн байдаг. Гэтэл энэ бүхэнд хараа хяналт тавих иргэний төлөөлөл өнөөдөр “Эрдэнэс тавантолгой” компанид огт байдаггүй нь эргээд Ерөнхий сайдын хамаатан садны компани тендэрт шалгарч хуулийг ноцтойгоор зөрчсөн асуудал нь Ерөнхий сайдын хувьд огцрохоос аргагүй үндэслэл болно гэж тэрбээр мөн хэлсэн юм. Түүнчлэн дээрх асуудалтай холбогдуулж Монгол Улсын Ерөнхийлөгч, Хууль зүйн сайд, Тагнуулын ерөнхий газарт тус бүр асуудлыг тавьж шалгуулахаар болж байгаа юм байна. Төрийн байгууллагуудын орон тоо дор хаяж 20-60 хүнээр нэмэгсэн талаар гишүүд хэлсэн юм.