С.Баяр Ерөнхий сайд болсныхоо дараа Тавантолгойн орд газрыг хэсэг бизнес эрхлэгчдээс бараг л булааж төрийн мэдэлд авсан. Дараагийнх нь Ерөнхий сайд С.Батболдын үед энэ орд газраас нүүрсээ гаргаж, бүх ард иргэддээ хувь, хишиг хүртээж эхэлсэн юм. Харин түүний дараагийнх нь Ерөнхий сайд Н.Алтанхуяг энэ орд газарт өөрийн төрсөн тулсан ах дүүсээ шахаж, томоохон тендерийг нь булааж, Увс аймгийнхнаар дүүргэх боллоо.

Сүүлийн гурван Ерөнхий сайдын Тавантолгойн талаар баримталсан бодлого ийм их зөрүүтэй. Энэ орд газар дэлхийд дээгүүрт орох чанартай нүүрстэйгээс гадна Монголын 764350 иргэн хувьцаа эзэмшдэг, 1500 орчим аж ахуйн нэгж бас хөрөнгөө оруулсан томоохон уурхай. Ийм том орд газарт Ерөнхий сайд Н.Алтанхуяг ямархуу хэмжээний ах дүү хамаатан садан, нутаг усны аалзны торыг найман сарын хугацаанд нэхчихээд байгааг дэлгэж байна.

1.  30 нас хүрээгүй хүргэн дүүгээ “Эрдэнэс-Тавантолгой” ХK-ийн ТУЗ-ийн дарга болгов. Түүний хүргэн дүү бол ЗГХЭГ-ын дэд дарга Г.Дэнзэн юм. Гадаад хэлний ямар ч боловсролгүй энэ залууг дэлхийд гайхагдах томоохон уурхайнхаа ТУЗ-ийн дарга болгоно гэдэг бол санаанд багтамгүй алхам. Болж байгаа нь ч, болгож байгаа нь ч ичсэнгүй.  Тэр өмнө Н.Алтанхуягийн зөвлөх бас туслах нь байсан юм.

2. “Эрдэнэс-Тавантолгой” ХK-ийн толгой компани бол “Эрдэнэс МГЛ” юм. Энэхүү төрийн өмчит “Эрдэнэс МГЛ” kомпани нь “Эрдэнэс-Тавантолгой” ХK-ийг 100 хувь, “Эрдэнэс-Оюутолгой” ХK-ийн төрийн мэдлийн 34 хувийг эзэмшдэг. Н.Алтанхуяг энэхүү “Эрдэнэс МГЛ”-ийн гүйцэтгэх захиралаар Увс аймгийн харьяат “Тэсо Трейд” компанийн захирал О.Сайнбуяныг томилсон байна. “Тэсо Трейд” ХХK нь зайрмагны үйл ажиллагаа эрхэлдэг. Н.Алтанхуяг дэлхийн хэмжээний том төслүүдийг  удирдах хамгийн том аж ахуйн нэгжээ зайрмагны kомпаний эзэнд ингэж даатгав. Энэ нь мэдээж улс эх орны эрх ашигийг биш амин хувийн хонжоог илүүд үзсэн шийдвэр гэдэг нь дараа дараагийн алхамуудаас нь тодорхой болно.

3.“Эрдэнэс-Тавантолгой” ХK-ийн 17 тэрбум төгрөгийн тендерт төрсөн дүүгийнхээ охины kомпанийг шалгаруулав. “Эрдэнэс-Тавантолгой” ХK-ийн 17 тэрбум төгрөгийн тендерт ялсан “Говь повер” ХХК-ний хувьцааг эзэмшигч нь Гэрэлхүүгийн Уянга. Түүний ээжийг Норовын Наранцэцэг гэдэг. Ерөнхий сайд Норовын Алтанхуягийн төрсөн дүү. ЗГХЭГ-ын дэд дарга бөгөөд “Эрдэнэс-Тавантолгой” ХK-ийн ТУЗ-ийн дарга Г.Дэнзэнгийн эхнэр. Нөхөр нь ТУЗ-ын дарга эхнэр нь тэднээс нүүрс зөөдөг ийм гайхамшигтай сүлжээг энэ Засгийн газрын үед байгуулав.

4. “Эрдэнэс-Тавантолгой” ХK эсвэл “Эрдэнэс МГЛ”-ийн аль нэгнийх нь дэд захиралаар Ерөнхий сайд Н.Алтанхуяг хамаатны дүү Цэвэгжав гэгчийг бас томилсон сураг гарав. Тэр найдвартай байдлыг бодож дэд захиралд хүртэл хамаатнуудаа шургуулсан бололтой.

5. Тавантолгойг хэрсэн Н.Алтанхуягийн хамаатнуудын сүлжээ үүгээр дуусахгүй. “Эрдэнэс-Тавантолгой” болоод “Эрдэнэс МГЛ”-ийн газар хэлтэсийн хурган даргаас эхлээд мэргэжилтэн, худалдан авах ажиллагааны газарт хүртэл Увсынханаа олноор нь байршуулжээ. Хэн тэднийг байршуулав. Бас яах гэж төрийн өмчит аж ахуйн нэгжид ингэж хамаатан садан, нутаг усныхаа ах дүүсээр дүүргэв гэдэг асуудал урган гарч ирж байна.