УИХ-ын чуулганы ээлжит хуралдаанаар  Ерөнхий сайд Н.Алтанхуягийг огцруулах эсэх тухай асуудлыг хэлэлцэж байна.
УИХ-ын гишүүн Ц.Оюунгэрэл хэлэхдээ  "Нээлттэй хөрөнгийн зах зээл дээр Монгол Улс гарч ирж байгаа анхны тохиолдол учраас манайхаас зах зээлд гарч байгаа  үнэ ханшыг бид давхар бодож байх учиртай. Гэтэл бид энэ асуудлыг боомттой холбож хэдэн долоо хоног сунжруулж ярьсанаар монголын компаниудын хувьцааны үнийг шууд унагаж байгаа. Дээр нь боомдын үнэ дээр ч гэсэн нөлөөлж байна. Засгийн газрыг огцруулах асуудлыг ярьснаараа бид гадаадын нээлттэй зах зээл дээр гарсан бүх компаниудаа  хорлож байгаа хэрэг юм.  Гадаадын мэдээллийн эх сурвалжийг иш татахдаа  мэдээллийн ил тод байлгах үүднээс гарсан мэдээлэл байна уу, эсвэл боомдын зах зээлд буюу олон улсын хөрөнгийн зах дээр нөлөөлөх зорилготой мэдээлэл байна уу гэдгийг ялгаж салгаж сурмаар байна. Тухайлбал Блүүмбэрг  зөвхөн хөрөнгийн зах зээл дээр чиглүүлсэн мэдээллүүдийг маш их тавьдаг эдийн засгийн хэвлэл мэдээллийн хэрэгсэлд орно. Энэхүү мэдээлэл үнэ ханшид нөлөөлөх мэдээлэл байна уу үгүй юу гэдийг ялгаж салгах хэрэгтэй.  Тэгэхээр манай улсын  үнэ ханшийг ямар нэг байдлаар унагаагаад нүүрс, баялаг, хөрөнгө оруулалтыг нь хямдруулчихаад дараа нь  хямдхан наймаа хийх бодолтой талууд байгаа шүү.

Мөн Шинэчлэлийн засгийн газрыг олон нийтийг дарамталж байна гэдгийг сөрөг хүчнийхэн ярьж байна.
Тэгэхээр Соёл, спорт аялал жуулчлалын яамны зүгээс МАН-д хэрэг үүсгээд явж байгаа нь үнэн. Үүнийг бид олон нийтэд нээлттэй хэлж байгаа. Бид Ленины музейн бүх үзвэрүүдийг улсад хүлээлгэж өгөөгүй байна. Лениний музейн соёлын өв тэр чигээрээ алга болсон байна. Мөн соёлын өвийг бүртгэдэг дэвтэрээ Соёлын яаманд хүлээлгэж өгөхгүй байна гэдгээр Цагдаагийн газар хандсан. Ингээд эрүүгийн хэрэг үүсгэсэн байгаа. Гэхдээ үүнийг бид дарамт гэж үзэхгүй байна. Аль ч засгийн газар байсан үнэхээр Соёлын яамаа байгуулсан бол соёлын өв сан хайччихсан бэ гэдгийг асуудлыг мөрдөх ёстой.  Үүнийг мөрдөхөд МАН-ын удирдах хүмүүс асуугдаж, байцаагдаж таараа. Та бүхний хадгалж хамгаалж байсан байранд тооллого орох нь зайлшгүй болж байгаа. Үнэхээр аль ч төрийн хувьд байх ёстой зүйл явагдаж байгаа юм" гэв.