УИХ-ын чуулганы хуралдаан үргэлжилж байгаа юм. Монгол Улсын Ерөнхий сайдыг огцруулах эсэх тухай асуудыг хэлэлцэж байх үеэр Ө.Энхтүвшин гишүүн "Энэ бүхэн МАН нь  олонхийг бүрдүүлсэн АН-ын засгийн газрыг унагах гээд хонзон санаа хийгээд байгаа зүйл биш. Зарим хүний амнаас ийм хариуцлагагүй үг өнөөдөр дуулдаж байна. Шүүмжлэлтэй үг хэлсэн хэн бүхэн та бүхний дайсан биш. Харин ажлыг чинь сайжруулъя л гээд байгаа юм. Дөнгөж Засгийн газар байгуулаад Ерөнхий сайдыг огцруулъя гэсэн саналыг бид тавиагүй. Ажиллах боломжийг  хангаж өгье хэмээн найман сар харсан. Бүхий л батлах ёстой хууль, төсөл, хөтөлбөр дээр нь оролцож, дэмжих зүйлийг нь дэмжсэн. Ирц бүрдүүлсэн. Гэтэл төрийн ажлыг 14 хоног гацаалаа гэх зүйл ярьж байна. Төрийн ажил, засгийн газрын ажил гацаагүй. Харин төрийн албыг тогтвортой явуулах тухай ярьсан. Өөрөөр хэлбэл, ард түмний аж байдлыг дээшлүүлэх тухай ярьж байхад яагаад төрийн ажил гацдаг билээ.

Ерөнхий сайд Үндсэн хуулийг зөрчнө гэдэг хамгийн том зөрчил. Нэг удаа биш гурван удаа зөрчсөн. Бусад дөрөв, таван хуулийн гуч гаруй зүйл заалтыг зөрчлөө. Энэ ч гэсэн Үндсэн хуулийг зөрчсөн хэрэг. Үүнийг Засгийн газраа, Ерөнхий сайдаа огцруулах үндэслэл биш ээ хэмээн зарим хүмүүс ярьж байна. Өнөөдөр УИХ-ын өмнө төрийн хууль зөрчсөн Ерөнхий сайд  ингэж явахад хууль зөрчиж буй иргэн хүнд хэлэх үг юу байх вэ?. Төрийн албаны талаар бид нэлээд маргалаа. Шударга хүмүүсийг өдөр шөнөгүй дуудаж айлгаж байгаад өргөдлийг нь гаргуулдаг. Төрийн албаны зардал ихэссэн тухай Ерөнхийлөгч ч хэлсэн. Чадалтай боловсон хүчнүүдийг хоморголон халчихаад найз нөхөд, хамаатан садан, бизнесийн түншээ төрийн албанд томилж байна. Ажлаа мэддэг хүн тэнд байхгүй. Тиймээс хууль зөрчдөггүй Ерөнхий сайдтай мөн хууль зөрчсөн хүнд хууль битгий зөрч гэж хэлж чадах Ерөнхий сайдтай болъё " гэв.